WILLEMSTAD. - Konseho Supremo Elektoral ta studiando e posibilidat pa organisá e dia di entrega di lista pa elekshon di 19 mart na un otro sitio. Semper a entregá lista na edifisio di registro sivil, pero debí na reglanan den kuadro di e pandemia okashoná pa COVID-19 ta wak si tin un mihó sitio kaminda por evitá aglomerashon di hende.

E entrega di lista en todo kaso lo no bai manera a kustumbrá kaminda kada partido ta bai entregá lista ku grupo grandi di simpatisante ku bandera  den sierto kaso asta kompañá pa un “brassband” òf DJ.

E aña aki lo pone regla pa garantisá un dia di entrega di lista muchu mas sobrio.

Asina mes Konseho Supremo Elektoral ta studia posibilidat pa organisá e entrega di lista na un otro sitio kaminda pues por organisá e dia aki mas mihó den kuadro di e reglanan di mantené distansia sosial.