WILLEMSTAD – Miéntras ku e trayekto di aprobashon pa oumento di webu ta pega serka Ministerio pa Asuntunan Hurídiko (WJZ), produktornan di webu ta sigui sangra sin un bista ki dia e oumento ya aprobá pa gobièrnu ta drenta na vigor. Ya ta bai kumpli tres siman ku Gobièrnu a aprobá e oumento di Fl. 4,88 pa Fl. 6,36. Na promé instante esaki a duna un espasio na produktonan di webu pa haña un espasio tantu nan proveedornan di kuminda speshal pa e galiñanan i tambe serka bankonan. Minister di Desaroyo Ekonómiko, sr. Ruisandro Cijntje a duna di konosé tres siman pasa ku e ta kere ku e e trayekto aki ta unu ku lo kana ku e rapides nesesario. Último dianan e minister a deklará den otro medionan ku ainda e proseso no a keda kla. E produktonan un biaha mas ta konfrontá problema finansiero serio i proveedor di kuminda for di Ulanda ya a informá ku no por duna krédito mas atrobe. Na promé instante el a koperá mirando ku e oumento di preis ta biniendo. Komo ku esaki no a tuma lugá ainda e kompania hulandes Dommelsche Watermolen no por sigui duna krédito mas. E debenan ta sigui oumentá enbes ku e produktonan kuminsá redusí esaki. Importadornan mester paga kèsh pa por haña nan kuminda pa galiña. Pa otro siman si no tin klaridat produktonan atrobe ta konfrontá e bèrdat ku lo mester kuminsá sakrifiká bida di algun galiña ku sin duda lo bai tin influensia riba produkshon i distribushon di webu atrobe.