WILLEMSTAD.- Segun reglanan di Fundashon Kas Popular defakto no ta permití pa kria porko den un bario habitá manera St. Jacobs. Ademas e porko molestoso ku EXTRA a publiká den edishon di ayera ta konosí ken ta su doño, òf a lo ménos na kua direkshon e ta pertenesé.

T’asina ku den edishon di ayera nos a referí na e porko ku lo tin doño, pero ku e doño no ta sali i ta laga e porko ta kana rònt riba kaya. Habitantenan di Muizenberg/St Jacob prinsipalmente Kaya Falcon tin bastante molèster di e porko aki. E ta para ku su kurpa na lodo i lastra esaki kantu di outonan ku por ta pará den e kaya. Habitantenan ta lanta mainta haña outo tur na rasku. I doño di e animal mes ketu, ainda e no ke sali. Habitantenan ta basta fadá i ta pidi pa e doño por pone su animal tras di waya.

Entretantu nos a risibí yamada di un habitante i a kòmbersá ku un empleado di FKP. E habitante a splika nos ku e porko aki ta pertenesé na un kas di famia den Kaya Merida (e number ta konosí pa EXTRA). Despues ku e wela ku tabata biba na e kas ei a fayesé e muchanan a disidí ku nan ta kria porko. Chistoso ta ku nan sa pone kabuya na garganta dje porkonan i kana rònt ku nan den bario manera animal doméstiko.

Segun e habitante, for di prinsipio dje bario FKP a pone un prohibishon pa tin krio na kas. Ni galiña no tabata permití pa kria. Esaki ta algu ku a keda konfirmá, aunke por bisa ku atraves di tempu kosnan a bai fo’i man, ya ku na momentu ku habitantenan tin kualke keho dje índole aki serka FKP, nan ta ser konsehá pa yama polis.

Pues ta di spera ku doñonan di e porko(nan) aki lo hasi kaso dje situashon pa evitá mas molèster.