WILLEMSTAD - Outoridatnan di Aruba i Kòrsou a hasi un petishon na Defensa pa sostené nan durante e tormenta ku lo mester a pasa durante e dia di ayera. Defensa a duna oido na esaki i a pone personal i medionan na disposishon.

Ayera a kuminsá na Kòrsou e desempeño konhunto, di Kuerpo Polisial di Kòrsou (KPC) huntu ku Milisia di Kòrsou (CURMIL). Desde un kantidat di 4 ofisinanan di bario di KPC, patruyanan mobil a keda ehekutá, ku e propósito di haña konsientisashon di e situashon ku nos tabata aden, i for di e punto ei e sentro di krísis di KPC ku a establesé, por reakshoná na un forma adekuá, pa medio di ubikashon di personal i material kaminda esei lo tabata nesesario. Banda di esei, si esaki tabata nesesario, por a duna asistensia na momentu di evakuashon di persona òf bienes, transporte di heridonan, ehekushon di tareanan di transporte, gestion di tráfiko státiko i dinámiko i aplikashon di mantenshon di órden.

Na Aruba tabatin 50 militar i material na ‘stand-by’ pa sostené outoridatnan lokal kaminda tabata nesesario ku kapasidat di transporte, asistensia na servisionan di emergensia i suministro di rekursonan logístiko.

E paisnan mes a tuma e inisiativa rondó di e kordinashon i direkshon di e tareanan i Defensa a sostené kaminda ta nesesario ku hende i material. Ademas di e rekursonan di Defensa, ku ya a ser desplegá, tabata posibel pa amplia esakinan si ta nesesario. Apoyo na outoridatnan lokal ta un di e tres tareanan primordial di Defensa. Defensa ta komprometé su mes pa yudansa (di emergensia) durante i despues  ku e tormenta pasa bai.