WILLEMSTAD. - Ayera defensa di abogado Loth den persona di mr Martis a hasi petishon pa skucha un total di 75 testigu den kaso Campo Alegre.
Entre otro vários di e damanan, Ronny Cornelis di MEO, dòkter Maduro, e persona ku tabata sòru pa antikonseptivonan pa e damanan, bewakernan di e lugá, algun miembro di kuerpo polisial i vários otro testigunan.
Korte di promé instansia a trata e kaso di abogado Jhon Loth den kaso Campo Alegre pro forma.
Ministerio Públiko tin 3 akusashon kontra Loth.
Ta trata di trafikashon humano di 5 dama, destrukshon i ta akusá Loth ku den e periodo di aprel 2018 te ku 2 di yüni 2020 komo direktor di Rectour Corporation esaki a keda deklará bankarota den un veredikto di 2 di yüni 2020.
Loth tabata manehá e sentro di prostitushon Campo Alegre. Despues ku e pandemia di COVID a presentá, Mr. Da Costa Gomez a splika ku Loth tabata laga e damanan pasa hamber i nesesidat.
Na vários okashon tabatin siudadanonan ku a trese kuminda pa e damanan, pero Loth tabata kue e sakunan di kuminda tira afó.
Tambe Loth lo mester a menasá e damanan ku apesar ku nan no ta dunando servisio, nan mester paga e kamber ku nan ta hospedá, tur dia 150 florin.
Si nan no hasi esaki, nan ta krea un debe serka dje i despues di e krísis di COVID-19 nan lo mester pag’é pa tur e dia nan i no ta haña nan sèn di bòrg mas. E tabata obligá e damanan pa tuma antikonseptivo pa evitá di haña nan regla i tambe ku nan no por a sali pafó di e tereno.
Tambe a kita internèt for di e lugá pa e damanan no tin akseso na prensa, polis òf abogado.
E damanan di Colombia ta esnan ku a keda mas largu den e instituto, pasó frontera tabata será i no por a sali pa regresá nan pais.
Tur esakinan tabata motibu pa un di e damanan hasi denunsia kontra e trato inhumano ku nan tabata konfrontando den e instituto.
No solamente e damanan so, pero e trahadónan di e instituto di Campo Alegre tampoko a haña nan pago.
Hues ayera a puntra Loth unda ta haña e damanan ku e ke pa wòrdu skuchá, e akusado a bisa ku tur e damanan su identidat i unda por lokalisá nan, ta na warda di polis.
Ta trata di damanan ku ta na Santo Domingo i Colombia .
Loth a ninga tur loke e ta keda akusá di dje.
El a bisa ku pe ta importante pa skucha algun bewaker, pa motibu ku nan a tende durante un fiesta di hasimentu di aña ku e dama nan a organisá den kura di Campo, bisa ku nan ta trahando plan pa duna denunsia falsu kontra di dje.
Ministerio Públiko den persona di fiskal Niks, a bai di akuerdo pa skucha solamente 8 testigu, entre nan Ronny Cornelis.
Hues a bisa ku e ta bai analisá e petishon i lo tuma e desishon otro siman 19 di yüni.