Willemstad.- Servisio di Defensa pa deshasí di Eksplosivo (Explosieven Opruimingsdienst Defensie) awe a destruí un karga enorme di ásido píkriko (picrinezuur) na Kòrsou. E destrukshon a tuma lugá riba petishon di outoridatnan di Kòrsou.

 Den pasado diferente laboratorio riba e isla tabata usa ásido píkriko. E supstansha peligroso aki, na momentu ku e keda atendé na un forma deskuidá, por kousa eksploshon. E ásido den mal kondishon tabata wardá den un depósito di ADC (Analytisch Diagnostisch Centrum) na Willemstad. Einan tambe tabatin resto di un supstansha igualmente peligroso, ku ta hidroxilamina.

Midimentu a demostrá ku destrukshon di e supstanshanan mester a sosedé bou di e asina yamá sirkunstanshanan CBRN (kímiko, biológiko, radiológiko, nuklear). Esei ta nifiká ku esnan ku ta destruí esakinan mester bisti paña di protekshon pa evitá daño na nan salú.

Perfekto

Ámbos supstansha a keda transportá pa e tereno di ehersisio na Wacawa bou di guiansa di Polis. Einan esnan ku ta destruí supstansha eksplosivo a laga e supstansha  aki eksplotá na un forma kontrolá. Sargento 1e klas Vincent ta bisa: “Nos ekipo ta trein hopi riba esaki, pasobra e ta un kondishon ku e tipo di eksploshonnan aki mester tuma lugá sin peliger. Pues e empeño a kana perfekto.’’

Sosten na outoridatnan sivil ta un di e tres tareanan mayor di Defensa den Region Karibe.