Riba petishon di outoridatnan di Saba, Defensa Region Karibe ta brinda sosten Militar na Saba. Marinirnan prosedente di Sint Maarten lo transportá material, pa konstrukshon di un stashon di midi nobo di ‘Koninklijk Nederlands Meteorologisch Instituut’ (KNMI)  - Instituto Meteorológiko Real  Hulandes.  E Militarnan ta riba e isla entre 5 i 14 di aprel.

Órgano Públiko Saba a pidi Defensa pa duna sosten ku desplasamentu di 1600 kilo di material. E material aki ta nesesario pa e konstrukshon di un stashon di midi di KNMI. E stashon di midi den futuro lo sirbi den monitoreo di aktividatnan sismológiko i/òf volkániko. Ta solamente posibel pa transportá e material na pia pa yega na e lokalidat di konstrukshon di e stashon di midi, i esei ta via di ‘North Coast Trail’ (un kaminda na e kosta Nort), riba un parti kaminda hende no por biba, i ta no-habitá. Defensa a bai di akuerdo ku e petishon pa pone Militarnan disponibel pa e desplasamentu di e material.

E operashon ta kuminsá riba dia 5 di aprel, ora ku e Militarnan ta nabegá riba un FRISC- (Fast Raiding Interception and Special Forces Craft-Un barku pa intersepshon rápido pa Forsanan Speshal) for di Sint Maarten bai Saba. Despues Defensa ta hiba e material ariba, na e lokalidat di konstrukshon. E operashon na Saba ta un forma di sosten Militar. Sosten na e outoridatnan sivil ta un di e tareanan konstitushonal di Defensa.

COVID

Pa por ehersé e trabounan na Saba, e unidat di Marinirnan a keda apuntá pa Saba komo ‘obreronan esensial’. Dor di esaki, mes ora despues di yegada por kuminsá ku e trabounan. Na momentu ku nan no ta trahando e Militarnan ta keda na un lokalidat designá den karentena. Nan lo keda aislá di e poblashon lokal i lo mantené nan mes na tur medidanan di seguridat pa COVID-19.