WILLEMSTAD.- Abogado general Angela ku a wòrdu sustituí pa mr Out den kaso Passaat, Germanium i Maximus den korte apelashon, ayera durante kaso Maximus a demandá George Jamaloodin na 30 aña di prizòn meskos ku e demanda den korte promé instansia.
Angela a bisa a base di deklarashon di e testigunan Edsel Gumbs, e testigu anónimo B5, Givenchi Maria, Nini Fonseca i ruman di Pretu Florentina di fam Boutisma, por a konektá tur na otro i konkluí ku Jamaloodin ta esun ku a paga pa mata Wiels.
Segun Angela e deklarashonnan di B5 por ser konsiderá konfiabel, pasó el a tende di e asesinato fo’i defuntu Raul “Bolle” Martinez ku tabata involukrá den e asesinato di Wiels i ku tambe keda asesiná despues.
El a sigui bisa ku e deklarashonnan ei ta sostené esun di Kuwas tambe.
Segun e testigu B5 mas aleu, defuntu Florentina a bis’é ku e ta esun ku a organisá e atrako riba e barku Summer Bliss i e mester a fia 100 mil florin kèsh serka Jamaloodin pa paga e gainan ku a kometé e atrako.
Abogado general mas aleu a para ketu riba e deklarashonnan di Maria i Boutisma i tambe e deklarashonnan di Jamaloodin ku a kontradesí esun di Fonseca.
Jamaloodin a deklará ku Fonseca semper tabata bin bend’é yen kos i asta a hipoteká un oloshi Rolex serka dje pa sèn, miéntras Fonseca a ninga redondamente ku e tabata bende Jamaloodin kos i nunka a hipoteká oloshi serka dje.
Abogado general a duna di konos’é ku e mihó amigu di Fonseca ku tabata Danilo Hansen, dia ku el a keda detené pa droga den maleta ku e tabata drecha pa Fonseca den e kaso ku a haña e nòmber Rizinja, a bisa ku e botin di oloshi entre otro Rolex ku a keda hòrtá durante un atrako na Renassaince, a wòrdu bend’é ku Jamaloodin i Luigi “Pretu” Florentina ta tras di e atrakonan.
Tambe abogado general a duna di konos’é ku loke e informante di Gumbs( eks hefe di VDC) a bis’é, esta ku e tabata pará banda di Jamaloodin ora Fonseca i Florentina a kore yega serka dje ofresé oloshi pa kumpra, pero Jamaloodin a bisa ku e bia aki e no ke oloshi pero tin un trabou pa hasi un hende friu, ta konfiabel i por wòrdu usá komo prueba aunke nunka a haña e informante aki mas.
Abogado general a bisa tambe ku apesar di e issue tokante entrega di Gumbs su telefòn di trabou na Yanüari 2013, tòg e ta pidi pa usa e informashon aki.
Segun abogado general Givenchi Maria tabata testigu sólido den e kaso aki.
El a bisa ku Maria a splika dikon el a kambia su deklarashon na 2017 i a keda para riba kon el a tende Florentina bisa Fonseca den su garashi, ku e ta negoshando morto di Wiels ku Jamaloodin.
Segun Angela otro prueba mas ta e deklarashon di e trahadónan di Jamaloodin ku a bisa regularmente nan tabata mira Fonseca na kantor.
Dia Fonseca a kai será e promé bes su ruman hòmber a presentá na kantor di “Speedy” hopi rabiá puntrando pa Jamaloodin.
Nan a bisa e promé bia Jamaloodin no tabata kier a enfrente, pero despues a sinta kuné den un kamber apart.
Dado momento nan a mira Jamaloodin sali pafó, despues kana bai bèk den e kamber ku un ènvelòp ku kasi no tabata para den su saku.
Segun e trahadónan, nan ta kalkulá ku den e ènvelòp lo tabatin un montante di 20 mil florin.
Despues e ruman hòmber di Fonseca a sali for di e kamber i bandoná e kantor.
Abogado general a papia di e sms nan entre Fonseca i Jamaloodin i a bisa ku Jamaloodin ta papia di tin e unifòrmnan kla pa e bai traha.
Segun Angela, tin unifòrm kla pa bai traha ta dos kos apart riba nan mes.
Pa konkluí, Angela a bisa ku e úniko nòmber ku a keda mentá den e kaso Maximus ta di su ruman Dos Santos, pero no por a haña e pruebanan sufisiente den su kontra te ku awor.
Segun Angela e úniko ku tin sufisiente prueba kontra dje ta di Jamaloodin.
Mirando esaki e ta yega na e demanda di 30 aña kastigu pa George Jamaloodin.