Frakshon PAR ta pidi reunion di urgensia

WILLEMSTAD.-Frakshon di partido PAR den Parlamento a kaba di entrega un petishon na presidente di Parlamento pa yama un reunion publiko urgente. E tema ta e kontenido grave di e rapòrtnan forénsiko riba CPR i RdK. Manera ta konosí CPR tabata den negosiashon ku Refineria di Kòrsou pa bira e operadó i hiba maneho di refineria Isla. A konstatá dokumentunan falsifiká i esei a pone ku finalmente RdK a stòp tur negosiashon ku CPR.

Lider di PAR sr. Quincy Girigorie a duna di konosé ku premier Pisas den un reunion di Parlamento di 11 i 16 yanüari último a pone algun dokumentu na disposishon di parlamentarionan ‘ter inzage’. Girigorie a bai lesa e dokumentunan den kuadro di e investigashon. El a keda di shòk pa loke el a tuma nota di den e dokumentunan. E punto mas krusial ta ku den Parlamento i tambe den entrevista pa duna informashon na komunidat Promé Minister a papia otro ‘lenga’ kompará ku loke tin den e dokumentunan.

E kontenido di e rapòrtnan ta hopi grave, pero e no ta kuadra ku deklarashonnan di sr. Pisas. E petishon a bai na presidente di Parlamento pa yama un reunion publiko ku karakter di urgensia. Mas detaye den edishon di EXTRA.