WILLEMSTAD. - Despues di e atentado ku a tuma lugá riba e periodista investigativo Peter R. de Vries, den un akshon relámpago polis hulandes a arestá dos persona den un outo riba karetera A4 i tabatin un di tres persona arestá, ku despues polis a laga den libertat, pa motibu ku e no tin nada di aber ku e suseso. Un wega di su amigunan a pone ku un dado momentu e persona aki tabata sospechá di ta metí ku e tiroteo.

For di momentu di e aresto, ya pa mas lat anochi durante e rueda di prensa, polis a duna di konosé ku nan ta kere ku e dos personanan arestá, nan tin tambe e pistolero.

Ayera a bira konosí den media hulandes ku un di e dos personanan arestá ta e “rapper” di desendiente antiano, nase na Tiel Hulanda Delano Geerman. E otro persona arestá lo ta un polako di 35 aña di edat.

Segun fuentenan ku a mira e loke ku a pasa, a duna polis señalamentu di e persona ku lo a tira i esakinan ta kuadra ku esun di Delano. E polako lo tabata e shofùr di e “getaway car”.

Despues di e aresto di Delano, 3’or di mardugá, un tim fuertemente armá a drenta den kas di Delano na Tiel i a listra e kas aki profundamente i a saka praktikante tur kos for di e kas.

Na mes momentu ku tabatin entrada hudisial den e kas di Delano na Tiel, tabatin entrada hudisial den e kas di e hòmber polako Kamil E. ku tabata shofùr, den su kas na Maurik.

Na e momentunan aki e dos detenidonan aki ta den aresto preventivo, pero separá di mundu kompleto i nan por tin solamente kontakto ku nan abogado i niun hende mas.

Segun amigunan di Delano, e tabata metí kaba ku krímen i a yega di ta tin kontakto ku hustisia.

Esaki ta konta pa Kamil tambe ku siman pasá dia promé di yüli tabatin un keho den su kontra pa menasa ku arma di kandela. Polis a yega e dia ei i a listra e outo di Kamil, pero no a haña nada.

Despues di e atentado riba Peter R. de Vries, Minister di Hustisia a oumentá e seguridat den Amsterdam, pero no a bisa kon ni di ki forma.

Ta trata di un suseso ku a  sagudí komunidat hulandes i hopi tabata esnan ku a pone flor na e lugá di e krímen.

Te ku ayera anochi, tabata teme pa bida di Peter R. de Vries ku ta luchando pa su bida.