Hopi biahe den fin di aña

WILLEMSTAD.- Un total di 9 parlamentario di kua 7 ta di frakshon di MFK, lo biaha e siman aki pa reunion di Parlatino ku ta tuma lugá na Panamá. 4 komishon di e parlamento di Latino Amérika i Karibe lo bini huntu dianan 12 i 13 di novèmber pa deliberá riba un variedat di tópiko.

E Parlamentarionan ku lo biaha pa Panamá e siman aki ta presidente di Parlamento, Fergino Brownbill kompañá pa Rigoletto ‘Rigo’ Thode, David Seferina, Maria Nita, Ramon Yung, Benito Desroches i Juniel Carolina. Tur ta di frakshon di MFK. Otro Parlamentarionan ku tambe lo biaha pa Panamá pa e reunionnan ta Quincy Girigorie (PAR) i Sheldry Osepa (PNP).

Notabel ta ku no tin parlamentario di frakshon di MAN-PIN den e delegashon parlamentario aki. Esaki no ta promé biaha ku e frakshon ta disidí  di no partisipá na e reunionnan di Parlatino. Ta dependé kua komishon ta reuní i ki tópiko ta trata ku e frakshon ta evaluá si tin un balor agregá pa asistí.

E komishonnan ku ta reuní e siman aki ta komishon di Seguridat di Siudadanonan, Kombate i Prevenshon di Narkotráfiko, Terorismo i Krímen Organisá, komishon di Servisio Públiko i Defensa di Usuario i e Konsumidó, komishon di Salú, i komishon di Edukashon, Kultura, Siensia, Teknologia i Komunikashon. E komishon di Seguridat di Siudadanonan, Kombate i Prevenshon di Narkotráfiko, Terorismo i Krímen Organisá lo para ketu na e tópiko di menasanan global manera terorismo i ekstremismo i nan presensia den Latino Amérika. Komishon di Servisio Públiko i Defensa di Usuario i e Konsumidó lo trata entre otro leinan modelo pa protekshon di dato di usuarionan i di turismo di peska.

Tambe e komishon lo deliberá riba akseso universal na servisionan i regulashon di servisionan esensial den senarionan di krísis. E komishon di Salú lo para ketu na mekanísmonan di funshonamentu di e sistema di salubridat. Lo trata un deklarashon riba sistemanan di salubridat unifiká i fuentenan di finansiamentu. E komishon aki tambe ta preparando un lei modelo riba malesanan króniko i prevenshon di esakinan.

E komishon di Edukashon, Kultura, Siensia, Teknologia i Komunikashon ta deliberá riba un lei modelo pa derecho riba skol kreativo. Tambe lo formulá un proyekto di lei riba bebinan ku nase prematuro i un proyekto di lei modelo ku ta garantisá edukashon sin distinshon di sekso i edat. Mas aleu lo para ketu na e avansenan di un estudio di un agènda regional pa fomentá siensia i teknologia.

Resientemente un delegashon parlamentario a biaha pa Chile pa reunionnan di Parlamericas ku ta otro organisashon parlamentario pa Sur Amérika Amérika Sentral i Karibe. Mas resien ainda presidente di Parlamento a partisipá na un reunion di Eurolat ku a tuma lugá na Tenerife. Despues di e biahe pa Panamá un delegashon parlamentario di 5 miembro lo ta na St. Eustatius pa selebrashon di Dia di St. Eustatius ku ta riba 16 di novèmber.

E miembronan di Brownbill, Seferina, Girigorie, Ruthmilda Larmonie-Cecilia (PNP), i Susanne Camelia-Römer (MAN-PIN). Dia 9 i 10 di desèmber tin otro reunionnan di komishonnan di Parlatino riba agènda. Tambe lo tin reunionnan di e Junta Directiva i e Mesa de Directiva di Parlatino.

Ta sera aña parlamentario di Parlatino dia 11 di desèmber ku un reunion di e asamblea nashonal. Pareu ku e reunionnan di Parlatino na desèmber lo tin otro biahe parlamentario pa Den Haag, Hulanda kaminda e 4 lidernan di frakshon den Parlamento, esta Seferina, Larmonie-Cecilia, Girigorie, i Giselle Mc William (MAN-PIN) lo partisipá na e di 37 edishon di InterExpo ku ta tuma lugá dianan 8, 9 i 10 di desèmber.