MAN-PIN ke sa ku ki meta

WILLEMSTAD.- Gobièrnu di Kòrsou a reservá riba presupuesto 2027 sumanan kuantioso pa un minister plenipotensiario tantu na Florida komo na Caracas. Frakshon di MAN-PIN ta hasi pregunta riba e echonan aki.

Bou di Ministerio di Asuntunan General a reservá 382.400 florin pa un minister plenipotensiario na Florida. Tambe a reservá un suma igual pa un minister plenipotensiario na Caracas, Venezuela. Esakinan bou di e pòstnan presupuestario 110317 i 110318.

Frakshon di MAN-PIN ta mustra ku no tabatin sumanan reservá pa e puestonan aki riba presupuesto 2026. “Ta promé bes ku e pòst aki ta riba presupuesto”, e frakshon di remarká den su preguntanan. E frakshon ta pidi un splikashon di parti gobièrnu i alabes ke sa kiko e meta ta pa postulá un minister plenipotensiario na Florida i Caracas.

Kòrsou semper tabatin un minister plenipotensiario na Washington. Den pasado tabatin unu tambe na Caracas den persona di Dito Mendes de Gouveia i unu na Repúblika Dominikana den persona di Jeffrey Corion. Pero pa hopi aña kaba esaki no ta e kaso mas.

Ta parse ku bou di gabinete Pisas ke bini bèk ku ministernan plenipotensiario na Caracas i Florida. Jerome Beeldsnijder ta nombrá komo minister plenipotensiario na Washington kaminda e ta kai bou di e embahada Hulandes komo un diplomátiko ku un agènda spesífiko na interes di Kòrsou. Na Miami tin un Konsulado General hulandes i na Caracas tin un Embahada hulandes.

E intenshon di gabinete Pisas ta pa nombra pues un diplomátiko na e Konsulado General i e Embahada menshoná. Konforme artíkulo 3 Relashonnan di Eksterior ta un asuntu di Reino. E minister hulandes enkargá ku Relashonnan di Eksterior ta alabes minister di Reino. Komo tal e agènda polítiko pa Relashonnan di Eksterior ta determiná na nivel di Reino.

MAN-PIN ke sa den kaso ku Kòrsou apuntá un diplomátiko na un Konsulado òf un Embahada di Reino den eksterior, ta kiko t’e agènda ku e diplomátiko aki mester bai sirbi. Pa e motibu aki e frakshon ta puntra pa e meta di gabinete Pisas pa reservá sèn riba presupuesto 2027 pa nombra un diplomátiko na Florida i na Caracas. No mester konfundí e posishon diplomátiko na Embahadanan òf Konsuladonan General di Hulanda ku e posishon di minister plenipotensiario na Den Haag.

E minister plenipotensiario na Den Haag no ta un funshon diplomátiko. E tin su propio gabinete i trabou prinsipal di e minister plenipotensiario na Den Haag ta pa representá promé minister di Kòrsou den reunionnan di Konseho di Minister di Reino. E ta hasi esaki tresiendo posishon di Kòrsou dilanti durante di e reunionnan aki.