Akuerdo na mesa ku PDVSA lo kumbiní Kòrsou!

WILLEMSTAD.-Informashon ku EXTRA ta dispone di dje ta indiká ku tin un delegashon chikitu di PDVSA na Kòrsou. Un avion privá a trese e delegashon ku e meta pa hiba kombersashonnan importante aki na Kòrsou. E speransa ta grandi ku e bishita lo redundá den akuerdonan konkreto. PDVSA tin un relashon di hopi dékada ku gobièrnunan di Kòrsou i hopi ta kere ku apesar di tur kos PDVSA tin kapasidat i posibilidatnan i pa e motibu ei tambe a hasi esfuerso pa trese e delegashon Kòrsou.

Manera ta konosí PDVSA no ta operadó di refineria Isla mas pero ainda ta pendiente pago di sesantia na trahadónan. Banda di esei tin debenan grandi habrí entre otro na Refineria di Kòrsou ku ta doño di e instalashonnan. RdK ta kanando e kaminda di korte pa trata na kobra sumanan mionario ku segun nan PDVSA mester kumpli kuné. Tin asta un kaso den korte na Merka unda RdK ta eksigiendo mas ku 51 mion dòler na pagonan atrasá di PDVSA.

E delegashon di PDVSA, ainda no a papia ku premier Rhuggenaath manera e promé mandatario mes a konfirmá pa EXTRA. Minister presidènt ta na altura ku e delegashon ta na Kòrsou, pero e no tabatin kontakto ku nan. EXTRA tin informashon ku e.o sindikato fungiendo komo intermediario a hasi tur manera pa konvensé konseheronan di premier Rhuggenaath pa regla un sita ku e persona prinsipal di e delegashon di PDVSA. E speransa ta grandi pa logra un kombersashon.

Informashon ku EXTRA a kompilá te na e momentunan aki ta ku esnan ku ta fungi komo intermediario ta den kontakto ku e tim di Venezuela riba base diario.

Prinsipalmente sindikatonan ta masha pendiente di e bishita aki pasobra ta for di mei nan a traha riba un plan sindikal debí ku nan ta mira ku Refineria di Kòrsou tin hopi problema pa kobra sierto sènnan for di PDVSA. Ademas e pago di sobra partinan di sesantia tambe a konosé su problemanan. E sindikatonan semper a mantené un bon relashon ku PDVSA i ta konsiderando esaki ku nan a saka un man pa sirbi komo intermediario. Sindikatonan ke sirbi pa trese RdK i PDVSA na mesa pasobra nan ta konvensé ku e kaminda di korte lo pone ku RdK mester bai para den un rei largu huntu ku otronan di rònt mundu pa warda pago di PDVSA. Nan ke logra ku via di nana bon relashon ku PDVSA ku Kòrsou por logra akuerdonan i asina haña pagonan pendiente.

Ta PDVSA i RdK mester sinta huntu papia pasobra ámbos banda ta indiká ku tin debe, p’esei ta huntu nan mester sinta pa yega na areglo.