WILLEMSTAD.- Porfin e deliberashonnan entre gremio, gremio sindikal i komersio riba reformanan sosial a inisiá. Den kuadro di e pakete di pais ta nesesario pa mas lihé ku ta posibel gobièrnu di Kòrsou yega na palabrashon di partnernan sosial riba e proposishonnan pa reforma pasobra e pakete ku proposishon mester ta kla pa mas tardá promé di yüli awor.

Sentral Sindikal SSK a manda resientemente un karta urgente pa minister di Desaroyo Sosial, Labor i Bienestar (SOAW), Ruthmilda Larmonie-Cecilia (PNP) ku tin alrededor di 19 lei sosial i laboral nobo òf eksistente ku sea mester aprobá òf kambia den parlamento den kuadro di leinan laboral formulá den pakete di pais.

Di e 19 leinan aki e sentral sindikal a identifiká 8 ku tin prioridat haltu. Un di e reformanan ku tin e sentral sindikal hopi preokupá ta e oumento di edat di penshun.

Ke evitá kasonan atrobe di hende ku ta baha ku penshun pero tin ku warda algun aña promé e por kobra su penshun di behes. Segun gobièrnu Hulandes subi edat di penshun di behes, kon difísil ku esaki ta zona mester ta enfátikamente riba mesa pasobra sin e medida aki riba término kòrtiku no por kubri e gastunan di seguridat sosial.

Tambe ta mustra ku pa hopi aña kaba e penshun di behes ta pegá na e mesun montante loke ta nifiká ku mester kambia e sistema. Alabes e sentral sindikal ta haña ku mester introdusí un penshun general pa tur trahadó pa asina e tin un penshun adishonal banda di su aov.

Un di e kambionan den lei ku SSK ta duna prioridat na dje ta e “arbeidsregeling” di aña 2000. E lei aki segun e sentral sindikal ta diskriminatorio pasobra e ta ekskluí e sektornan di haf manera airopuerto i haf marítimo.

E areglo di traha a base di un kontrato di 0-ora (“nul uren contract”) segun SSK tambe mester trese kambio den dje. Ta kòrtá manera ta haña ta bon den ora di e trahadónan i konsekuentemente nan ta kobra fin di luna ménos ku suèldu mínimo.

Tambe mester yega na un mihó areglo pa e lei di suèldu mínimo. Mester bira mas fásil pa por indeksá esaki, e sentral sindikal ta indiká.

Mas di e kambionan di lei ku SSK ta kere ku mester duna prioridat na dje ta esun di kompanianan ku ta bai fayit. No por ta asina ku ora un negoshi bai fayit e trahadó ta último pa kobra loke ku e doño di trabou deb’é, despues di kaba di paga tur otro instansia.