Fecha tentativo Diálogo Nashonal te 22 di òktober

WILLEMSTAD.- Apesar ku e tópiko di oumento di kosto di bida ta haltu riba agènda di e plataforma Diálogo Nashonal i ta un punto ku sentralnan sindikal ke papia ku urgensia riba e tópiko aki, no ta logra por lo pronto pa yama e plataforma huntu den un reunion.  No a logra di yama e reunion pa siman pasá i e siman aki tampoko ta bai logra mirando tur e aktividatnan den fin di e siman aki relashoná ku Dia di Outonomia.

Segun EXTRA por a komprondé e fecha tentativo pa e siguiente reunion di Diálogo Nashonal ta 22 di òktober, ku ta te aki 2 siman. Pa e fecha aki Regulatory Authority of Curaçao (RAC) lo ta serka di publiká e preis i tarifa di kombustibel i utilidat pa luna di novèmber. Den un reakshon kòrtiku presidente di sentral sindikal  SSK, Wendell Muelen ta bisa ku si no tin bahada den kosto di bida pa luna di novèmber.

Si tin un mínimo di subida mester eskalá akshonnan fuerte kontra esaki pasobra awa a pasa hariña awor si i kòmbersashonnan ya kaba ta andando den direkshon di eskalashon.  E tópiko di oumento di kosto di bida a haña fin di sèptèmber un dimenshon nobo, despues ku a anunsiá oumento di preis i tarifa di gasolin, disel, awa i koriente siman pasá. Fasilitadó di e Diálogo Nashonal, Suparmy Goeloe a indiká den deklarashon pa EXTRA siman pasá ku pa e tópiko aki ta deseabel ku tin otro ministernan presente durante di e reunion.

Ta trata di promé minister Gilmar ‘Pik’ Pisas i minister di Desaroyo Ekonómiko, Roderick Middelhof. RAC a anunsiá ku entrante djamars 29 di sèptèmber próksimo preis di gasolin na pòmp ta subi di 2,597 florin pa 2,725 florin pa liter. Un subida di kasi 13 sèn pa liter. Pa loke ta disel, esaki ta subi di 2,373 florin pa 2,819 florin pa liter ku ta un oumentu di kasi 45 sèn pa liter.

Tarifa di awa i koriente tambe a subi entrante promé di òktober awor. Koriente ta subi di 0,6307 florin pa 0,6956 pa kWh pa e promé 250 kWh na uso. Esaki ta un oumento di mas ku 6 sèn pa kWh. Tarifa di awa ta subi di 8,4009 florin pa 9,1106 florin pa meter kúbiko pa uso di e promé 9 meter kúbiko di awa. Esaki ta un oumento di kasi 71 sèn pa meter kúbiko.

Lider di partido MAN, Giselle Mc William i sekretario general di sentral sindikal CGTC resientemente a bolbe lansa e gritu pa baha e akseins i/òf eliminá un di e “schakel”nan di OB riba kombustibel. Mc William a trese esaki dilanti for di 2022 i a bolbe ripití esaki na mart 2026. Te ainda gabinetenan Pisas no a hasi un moveshon den e direkshon aki.