El a bisa ku ta Chamo tabata fia su vehíkulo pa kometé e aktonan

WILLEMSTAD.- E hòmber Daylon Tatem di apénas 21 aña di edat ayera a keda demandá na 14 aña pa 8 echo kastigabel ku e ta keda akusá di dje.

Tatem ta keda akusá di  6 atrako, sekuestro, violashon i arma. Ta trata di atrako armá ku el a kometé 11 di febrüari riba 2 víktima, di kual el a aserká nan, ranka nan tas, dal nan benta bou  i menasá nan.

Atrako armá dia 17 di febrüari di kual el a aserká su víktima i bou di menasa ku arma di kandela, a ranka su tas di kompra i bai kuné.

Otro atrako armá dia 19 di febrüari kaminda el a atraká e víktima,  saka arma di kandela i bisé pa dun’é tur su pertenensianan. Nan tabata konsistí di un pòtmòni ku un kontenido di 600 florin, iPhone 6 i  tas di e víktima.

Riba e mesun fecha el a bolbe kometé otro atrako riba dos víktima  di kual el a menasá nan, kita nan pertenensia, mas 100  florin, tarhetanan di banko i vários otro pertenensia mas. El a hinka man den un di e víktimanan  su saku saka sèn, ranka su tas di kompra  i ku un tono agresivo el a bisa nan pa nan kana bai promé ku e tira nan mata.

Tatem ta keda akusá  tambe di a sekuestrá un dama dia 20 di febrüari. El  a pone un arma di kandela na su kabes, i a oblig’é drenta su vehíkulo bou di menasa i grit’é pa e no yora ni grita si no e lo tir’é mata.

Despues  el a kore drenta mondi kuné i kontra su boluntat a kometé aktonan di inmoralidat kuné.

E ta keda akusá pa violashon seksual di un damita. Segun deklarashon di e víktima, e akusado a pone arma di kandela na su kabes, tapa su kara i viol’é.

Siguiente dia e akusado lo mester a bolbe atraká dos persona di kual el a logra bai ku 40 dòler.

El a dal den nan vehíkulo ku su outo marka Mitsubisihi Lancer  na altura di Vanddis Rio Canario i a saka un  arma di kandela i eksigí nan pa duna tur nan pertenensianan  si no e lo tira nan.

E pareha a logra kore bai, di kual e akusado a persiguí nan i na altura di Hariri Car Rental, el a logra blòkia nan i atakánan bou di menasa di arma di kandela i pidi nan sèn.

E víktimanan a dun’é 40 dòler ku el a ranka fo’i nan man.

E akusado a ninga tur e akusashonnan. El a bisa ku tabatin un Chamo ta biba na su kas i e Chamo ei tabata fia su outo.  Pero Chamo a bai Venezuela bèk i no sa kon pa hañ’é.  Hues a duna di konosé ku remarkabel  ta ku tur e víktimanan ta papia di un hòmber koló skur kabei di drèt manera e.  I tambe ku tur e tabata usa e mesun vehíkulo pa kometé su aktonan. Pero e ta ninga redondamente.

Pa loke ta trata e kaso di violashon, e akusado a bisa ku ta fo’i òktober aña pasa el a tene relashon ku e dama den un forma amoroso.  Despues nan a bolbe tene relashon.

E víktima a ninga di konos’é e akusado. El a bisa ku e hòmber a kore yega riba dje den un vehíkulo kòrá, pone arma na su kabes i oblig’é drenta outo i viol’é, ora ku e tabata kanando pa bai kue bùs. Dor di miedu e víktima no a presentá ayera, pero su mama si tabata presente.  Su mama a duna di konos’é ku e víktima te ku awor ta troumatisá i no ke kana bai kue bùs nunka mas.

Fiskal a haña e akusashon probá i a hasi demanda di 14 aña  mirando e echonan grave ku e akusado ta keda akusá di dje.

Hues a bisa ku e lo tuma desishon aki 3 siman.