WILLEMSTAD.- Awe djarason, 26 di sèptèmber, korte a trata e kaso penal di Ministerio Públiko (OM) Kòrsou kontra e hòmber C.A.C.-V. (Venezuela, 1991). Ta sospechá e hòmber aki di vários kaso di atrako armá i uso di arma di kandela. Ta trata di e investigashonnan “Castorweg”, “Paseata” i investigashon “Escape”.

Dia 28 di aprel 2016 el a kometé un atrako armá riba habitantenan den un kas den bario di Kanga, un maltrato pisá dia 30 di mart 2016 na unda el a herida un doño di un tienda ku un arma di kandela, un atrako armá dia 12 di mei 2016 riba Toko Hong den Elmerstraat, un ladronisia dia 18 di mei 2016 den un kas riba Witteweg i un ladronisia kometé 31 di mei 2016. Tambe den e kasonan a akusá e hòmber di poseshon di un arma di kandela. Ademas ta akusá e hòmber di ladronisia/ekstorshon dia 31 di mei 2106 di un polis i intento di asesinato dia 31 di mei 2016 di un polis. Tambe el a trata di hui for di prisòn dia 18 di mart 2018 na unda el a kousa destrukshon den su sel den Blok 4 i kòrta prikkeldraad pa logra hui. E kaso a keda na un intento di huida.

Fiskal di Ministerio Públiko (OM) a hasi un demanda awe den korte pa un kastigu di prisòn di 15 aña pa C.A.C.-V. Tambe Fiskal a pidi wes pa otorgá un petishon pa daño i perhuisio di 5.198 florin na un di e víktimanan ku a sufri daño. Wes ta duna su veredikto aki tres siman, riba 17 di òktober 2018 pa 10 or di mainta.