WILLEMSTAD.- E pareha Shelomi Plantijn (30) i  Azanahil Maduro(34) a keda demandá ayera na un kastigu di 12 aña kada unu.

Aparte di e sekuestro, maltrato, agreshon, aktonan di inmoralidat i intento di asesinato di e damita stazjèr hulandes di 17 aña dia 25 di ougùstùs 2029, ámbos ta keda akusá di a kometé atrako riba un dama venezolano dia 2 di sèptèmber 2019 na Willebrordus.

Tantu e stazjèr komo e dama venezolano tabata presente den sala di korte.

Segun deklarashon di e dama, e tabata  koriendo su vehíkulo for di rotònde di Zegu direkshon Willebrordus, ora ku el a tuma nota di un vehíkulo ku tabata persiguié. Dado momento nan a par’e i Plantijn a baha rank’e fo’i outo, rank’e den su kabei , bis’e sera su boka na palabra ofensivo, agredié i bai ku su vehíkulo. E víktima a konta ku e muhé ku tabata sintá den outo huntu ku e hòmber, tambe a baha dal e algun bòfta den su kabes, pa despues bent’e abou.

Esei a pone ku el a pèrdè konosementu un ratu i ora el a habri wowo el a mira e hòmber tabata bayendo ku su vehíkulo.

Polis despues a haña e vehíkulo bandoná kantu kaminda i durante investigashon, a haña rastro di e palma di man di Maduro den e outo. Durante un konfrontashon di foto, e víktima a rekonosé Plantijn mes ora komo esun ku a bah’e fo’i outo.

El a duna deskripshon di e muhé ku tabata ku Plantijn i esaki ta kuadra ku e akusado Maduro.

Plantijn na su turno  a bisa ku e no sa nada di e  kaso ei.  Maduro a bisa ku e ta un persona ku gusta yuda hende fo’i chikí.

El a  splika ku e dia ei el a  pasa mira un outo para kantu kaminda.

El a para baha i kana rònt di e outo pa wak si kisas ta hende por a bira malu.

Ora ku e no a mira hende, el a drenta su vehíkulo i bai. El a bisa ku dor ku el a mishi ku e outo kisas su rastronan di man a keda na dje.

Segun Maduro, e no tin mester di outo paso e mes tin su vehíkulo.

“Mi tin mi trabou, mi mama  ta den ròl stul, tata ta serka di pèrdè pia i mi mes tin sèn ku por kria mi hendenan”. Pues no tin nodi atraká hende, segun Maduro.

Fiskal Hato -Willems a bisa entre otro den su rekistorio, ku Shelomi a mustra polis tur e lugánan ku nan a bai ku e stazjèr, unda nan a top’e promé, i tur e  otro kamindanan ku nan a kore den detaye.

El a deklará ku despues di nan akto nan a tira afó tur e kosnan ku nan a hòrta for di e damita durante ruta.

E sèn nan a uza pa kumpra “pampers”, lechi i otro kosnan pa nan baby. Tambe ámbos víktima a rekonosé e akusadonan. Fiskal a bisa ku awe e damita stazjèr ta na bida no ta danki na e pareha.

Mirando tur esakinan fiskal a haña e akusashonnan legalmente i konvinsentemente probá i a hasi demanda di 12 aña pa kada un di e akusadonan.

Aki 3 siman hues lo dikta sentensia .

LAGA UN KOMENTARIO

Please enter your comment!
Please enter your name here