Akusá di a kometé aktonan inmoral ku vários menor

WILLEMSTAD.- Fiskal Lepel ayera a demandá Edson Nahr(38) ku ta yama su mes un profeshonal den guia di mucha i tabata duna lès di kanto na un “opvang” i tambe na un kor di misa, na 10 aña di kastigu.

Fiskal a bisa ku normalmente un kastigu di aktonan inmoral ku menor ta 3 aña i  e kastigu máksimo 6.

Pero fiskal a konsiderá e aktonan ku Nahr a kometé ku vários menor hopi kruel, kaminda el a hasi hopi daño na e menornan i asta laga nan ku trouma, ku algun di nan te ainda ta den man di sikólogo.

Nahr a para riba ku e no por komprondé e link ku ta  akus’é di a mishi ku e muchanan.

Na vários okashon ayera durante su kaso, el a bisa k e ta un profeshonal i nunka lo hasi algu asin’ei ku mucha.

Segun deklarashon di un di e víktimanan ku ta dama, dia e tabatin 8 aña e tabata biba serka un tanta i tabata kanta den un kor di misa kaminda Nahr tabata duna lès.

El a bisa ku tur bia Nahr tabata hib’é kas huntu ku vários mucha den outo. Riba un dia Nahr a pasa su kas “voorbij” i a kore para na Blachi bèrdè.  E akusado a kue su kara tene kuminsá sunchi e i  tambe mishi kuné.

Segun e víktima, despues di un par di dia, e hòmber a baha tur e muchanan na kas i laga su so den outo. El a bolbe kore pasa su kas bai i para un bia mas na Blachi bèrdè. El a kue sunchi e i e bia aki si e akusado a hasi sèks kuné.

Segun e víktima, el a  kuminsá sangra i tabata sinti doló. Ora el a yega kas, el a bisa su tanta ku e tin sanger den su karson. Su tanta a bis’é ku kisas el a haña su regla. E víktima a bisa ku e tempu ei e tabata hopi chikí i no por a defendé su mes.

Mas aleu e víktima a deklará ku e akusado tabata hopi haltu den un iglesia i niun hende tabata kere e kosnan ku e tabata hasi. Esei ta pone ku e tabata probechá di e menornan. E kaso aki tambe Nahr ayera a ninga redondamente.

Fiskal a puntra Nahr si ta tur e menornan  ta gaña riba dje.

Nahr na su turno a bisa ku pa hopi dia el a sinta pensa, pero  e no por haña e link unda e kosnan ei a sali.

Segun Nahr , hopi hende a papia hopi kos  di dje den komunidat, per e no a wòri su kabes pasó e ta positivo aktivo i tabata terminando su estudio di HBO pa e sigui yuda e muchanan den komunidat. Riba esaki fiskal a bisa e akusado ku apesar ku hende tabata papia riba dje , tòg e tabata  laga muchanan menor drumi kuné riba kama.

Nahr a bisa ku e no tabata hasi nada robes.

Fiskal den su rekisitorio a bisa entre otro ku Nahr a hasi mal uso di e konfiansa ku e mayornan a dun’é. E tabata duna lès na muchanan di 8 pa 15 aña. E mayornan tabata mir’é komo un tata di konfiansa.

Tur e muchanan hòmber tabata bisa ku ora nan ta drumí, nan ta sinti un hende ta mishi ku nan parti íntimo i tambe tabata hasi sèks oral ku nan.

Fiskal a bisa e ta kere ku tin hopi mas víktima ku no a bin dilanti pa hasi denunsia, pa motibu di kurashi. Fiskal a kompará e kaso ku esun di apòstel Balentin, pero a bisa ku den e kaso di Nahr no tabatin muchu penetrashon, pero mas tantu mishimentu.

Segun fiskal e solo echo ku e akusado no ta rekonosé su aktonan i no ta aseptá e loke nan el a hasi ta robes, ta  nifiká ku e rísiko ta keda haltu ku e por bolbe kometé e mesun akto.

Mirando tur esakinan fiskal a yega na un demanda di 1O aña di kastigu . Dia 9 yanüari hues lo dikta sentensia.