WILLEMSTAD.- Un kaso kaminda Ministerio Públiko a hasi un demanda di 10 mion florin kontra dr. Emsley Tromp, alegando ku e mester tabata sa ku su informashon di entradanan suministrá na belasting no tabata korekto, a bin kaba na 0. Korte di apelashon a apsolvé Tromp un bia mas di tur akusashon pa loke ta trata skondementu di su entrada pa impuesto.

Den un kaso ku a keda trata 26 di òktober 2017 OM a hasi un demanda di 10 mion florin kontra di e eks presidente di Banko Sentral di Kòrsou i St.Maarten. https://extra.cw/demanda-di-10-mion-florin-but-pa-emsley-tromp/

Abogadonan di Tromp a mustra ku e akusashonnan no ta kuadra i dia 17 di novèmber 2017 korte a apsolvé Tromp di tur kulpa. https://extra.cw/sr-emsley-tromp-apsolve-di-tur-kulpa/

Pero OM a apelá e kaso.

Ekspertonan den ámbito di impuesto na algun okashon a mustra ku Tromp tin algun kondishon na su fabor. Na promé lugá ta asina ku e akusado tabatin un konsehero di impuesto rekonosé ku tabata enkargá ku yenamentu di su asuntunan di impuesto. Reglanan di impuesto ta splika hustamente ku den kaso ku tin un konsehero di impuesto rekonosé ta atendé ku e asuntunan di impuesto no por bai kulpa e persona si tin kualke fayo. Ta hustamente pa e motibu ei e persona ta paga pa servisio profeshonal di un konsehero rekonosé di impuesto.

Na di dos lugá Tromp tabatin loke ta konosí komo un ‘ruling’ di impuesto. Esei ta enserá ku inspektor di impuesto a duna aprobashon na Tromp pa atendé su asuntunan den sierto forma. as detaye di e veredikto den edishon di EXTRA.