El a drenta via dak i haña eks ku otro hòmber

WILLEMSTAD.-Ministerio Públiko a hasi demanda di 12 aña pa Marlon Bicenta (37) nasé na Jamaica, akusá di a hinka e víktima Sheriff Ballentine, tambe nasé na Jamaica 1e di òktober 1978 ku e konsekuensia fatal.

Segun e akusashon, Bicenta a hinka e víktima na vários parti di su kurpa ku un skrufdrai dia 11 di òktober 2020.

Na total e víktima tabatin 12 hinká kual 1 a bora partí di su kurason i result’é fatal. Dos dia despues di e suseso, Bicenta a entregá su mes na polis.

Bicenta a presentá ayera den sala di korte pa responsabilisá su mes pa su akto.

El a bisa di a aktua den defensa propio i hamas tabata su intenshon pa mata niun hende.

Segun e akusado,  e dia ei e tabata yama e dama Sabrika (kende e tabatin relashon amoroso kuné) vários bia, pero e no a kue telefòn. Den oranan di mardugá el a bolbe purba, pero tampoko a haña kontesta.

Esei a pone ku el a disidí bai kas di e dama pa wak kiko a pasa kuné.

Riba e pregunta di hues Snitker, dikon el a drenta e kas via dak, e akusado a bisa di tabatin kustumber di hasié.

El a splika ku Sabrika tabata un amiga di dje i ta’tin solamente sex kuné.  E  tabatin otro dama tambe.

Hues a bisa segun e deklarashon di e dama, el a konosé e akusado un par di luna promé ku e suseso.

Despues el a disidí kaba e relashon, pero e akusado no kier a tende. Segun e dama esei a pone ku el a yama polis un bia ku e tabatin diskushon ku e akusado.

E akusado a bisa, nunka Sabrika a bis’é ku e kier a kaba e relashon kuné. Segun e akusado, si e lo a hasié, e lo no a hañ’é den e kos aki.

Hues a puntra e akusado dikon e tabatin un skrufdrai den su poder ora el a bai na e kas di e dama.

El a spliká ku e tabatin e skrufdrai den su tas. El a hañ’é na e kas mes abou bentá, un bia ku el bai i a hink’é den e tas ku e ta kana kuné.

El a us’e pa habri bentana un bia na e kas. Segun e  akusado, ora el a drenta den e kas i topa e hòmber, el a spanta pasó e hòmber a kuminsá agredié i p’esei el hasi uso di defensa propio.

Sabrika na su turno a deklará na polis ku un par di luna promé el a konosé Ballentine. Nan tabatin un amistat i ratu ratu tabata drumi ku otro

Dado momento e kier a kaba e relashon ku Bicenta, pasó el a haña otro frei.

E anochi promé ku e insidente, el a bin fo’i laman ku su frei nobo i mei mei di anochi mas o ménos kuat’or di mardugá, el a  lanta ora el a tende un zonido den baño. E víktima ku tabata drumí band’i dje,  tambe a lanta i huntu nan a kana bai baño.

E víktima a habri e porta di baño, pero un hende a trèk e porta bek ser’e.

Ora nan a bolbe ranka e  porta,  esaki a habri i nan a topa Bicenta den baño.

Segun e dama, a surgi un bringamentu entre e víktima i Bicenta .

El a sigui konta ku Bicenta tabata bati e víktima sin laga bai. E na su turno a bai kue un martin dal Bicenta kuné den su kabes pa purba kita nan fo’i otro, pero pa nad’i mundu Bicenta kier a laga bai.

El a kore bai pafó buska yudansa, pero bisiñanan tampoko no a por a kita nan fo’i otro.

Dado momento nan a mira sanger tabata  spùit, pa despues mira e akusado sali kore bai.

Algun ratu despues a haña e víktima drumí den un krenwá tur na hinká. E víktima tabatin 12 kòrtá na su kurpa entre otro, su kara, skouder, garganta, kachete i esun fatal ku tabata mas profundo ku a penetrá den su kurason.

E akusado a bisa ku e tabata hopi den shòk i no por a kere loke a pasa, pasó nunka tabata su intenshon di mata hende.

El a bisa e no tabata sa ku e víktima a fayesé.

P’esei despues di dos dia ku el a tende esei, e mes a bai entregá na polis.

E dama Sabrika a deklará na polis, ku un siman promé ku e suseso tuma lugá, el a bai polis i a hasi denunsia despues ku e akusado a drenta su kas via dak.

E dia ei el a bolbe tende zonido i a mira e akusado ta baha fo’i dak. El a kuminsá grita, pero e hòmber a kue sera su boka, bis’é bisti paña i bin pafó. Ora nan a sali pafó bisiñanan a kuminsá wak i asina el a haña chèns di kore bai.

Segun e dama, dia el a bisa Bicenta ku e no ke tin nada mas kuné, e akusado a bis’é ku e no por lag’é niun manera i a menas’é.

Hues a relatá ku na 2005 e akusado a keda kondená na 12 aña pa sekuestro i atrako ku morto. Segun e akusado e no tabata esun ku a kometé e asesinato e dia ei.

Fiskal a haña e akusashon kompletamente probá i a demandá e akusado na 12 aña.

Hues lo dikta sentensia dia 24 di febrüari binidero.