WILLEMSTAD.- Korte di apelashon a bai di akuerdo ku abogado general Angela, pa kontinuá ku tratamentu di e kaso “Jetta”, den ousensia di e akusadonan L. “Chaini” òf “Michelito” Yeung (20) i E. “Buch” òf “Micho” Jamanica (22). Ámbos a keda akusá pa  poseshon di 2 arma di kandela outomátiko, mas 73 bala, dia 23 di yanüari 2019 den un vehíkulo.

Den korte di promé instansia, hues a apsolvé e akusadonan di tur kulpa. Ministerio Públiko no a bai di akuerdo i a apelá e sentensia. E akusado Yeung tabata enkarselá pa un kaso di atrako, mas poseshon di arma últimamente. Pero pa un fayo den su prosedura, el a bai den libertat. Resientemente durante tratamentu di e kaso, niun di dos akusado a presentá den sala di korte.

Abogado Sulvaran a splika e tribunal, ku e no tin niun kontakto ku Jamanica. El a bisa di a papia ku Yeung si algun dia promé ku tratamentu di e kaso i Yeung a bis’e, ku e lo presentá na korte. Pero esaki no tabata e kaso. Mirando esaki e tribunal di Hof, a disidí di bai di akuerdo pa trata e kaso den su ousensia (“bij verstek”).

Abogado general Angela, den su rekisitorio, a duna di konosé ku Yeung a keda kondená na detenshon hubenil pa un kantidat di arma i droga na 2017. Tambe e ta keda akusá pa kómplise di un kantidat di 4 pistol, mas 56 bala dia 27 di ougùstùs 2019. Mas aleu el a sigui bisa, ku e arma tabata den dos diferente tas den e outo ku tabata abou poné parti patras.

Segun abogado general, e diskushon ta bira si e sospechosonan tabata sa ku e armanan tabata den outo, òf si nan tabata na altura ku e  tasnan, tabatin arma den nan.

Mirando tur esakinan, hues di korte di promé instansia, no tabatin prueba si e akusadonan tabata na altura di e tasnan den outo òf tabata sa ku tabatin arma den nan. Esaki tabata e motibu ku el a duna nan“vrijspraak”.

Mas aleu abogado general a konta ku riba e dia enkuestion, polisnan tabata bayendo den direkshon di Bándabou ku sirena i tur vehíkulo tabata hala un banda pa  nan pasa. Direpente shofùr di  e Volkswagen kolo kòrá, no a tene su mes na regla i a pasa di un forma iresponsabel mei mei di tur e outonan, raspa un vehíkulo, kita su spil i sigui kore bai.

Dor di e akto aki, e vehíkulo a wòrdu blòkia pa polis.  Durante ku nan tabata listra den e outo, nan a haña 3 tas.  Jamanica tabatin un di e tasnan na su hep ku pertenensianan di Yeung i e otro dos tasnan, tabata riba e flur patras den e outo.

Segun abogado general, den un di e tasnan tabatin un glock i  den e otro un uzi .

Huntu ku e tas ku tabatin e uzi aden,  polis a haña un telefòn ros marka Nokia ku a resultá di tabata di Yeung.

Den e telefòn polis a haña un kòmbersashon intensivo ku e akusado tabatin ku su tata, riba un number ku tabata di safe na “tata”.

Yeung a bisa den su kòmbersashon, ku polis a detené na Otrabanda i a hañ’e ku mariwana.

Riba e dia ei tambe e polisnan ku a traha prosèsverbal, a bisa ku e akusado tabatin un Nokia ros.

Despues di e detenshon di Yeung, polis a tap un kòmbersashon di e tata kaminda e ta bisa un tal Enrique pa “ruim op tur kos”. “Michelito” a keda detené i tabata den poseshon di su arma”.

Mirando esakinan abogado general ta bisa ku abase di e kòmbersashon aki por konkluí, ku manera Yeung su tata mes a bisa ku e tabata den poseshon di arma i netamente den e tas ku a haña su telefòn, tabatin e glock.

Abogado general ta haña ámbos akusado kulpabel pa e armanan.

Segun abogado general, Yeung ta un residivista i tabata den su periodo di prueba.

Abogado general ta hasi demanda di 60 luna pa poseshon di e armanan, 9 aña pa e kaso di atrako i 18 luna ku tabata kologá riba su kabes. Pues un total di  kasi 15 aña i mei pa Yeung.

Pa Jamanica abogado general a pidi 48 luna di kual 12 kondishonal kitando aresto preventivo.