WILLEMSTAD.- Abogado general ayera a hasi demanda di 16 aña pa e akusado Nathaniel Doran (31) den Hof.
Doran a keda kondená na 14 aña, pa e kaso di asesinato di su propio primu ku a haña e nòmber “Toucan”.
El a apelá su sentensia pa motibu ku e ta haña ku el a aktua den defensa propio.
E ta insistí ku ta e víktima a saka ko’i tira promé riba dje.
E asesinato a sosodé dia 3 di novèmber 2017, di kual e víktima Jurven Maria alias “ Boody” di 27 aña, a keda asesiná ku un tiru den su kabes i na parti abou di su kurpa den área di Mahuma.
Ministerio Públiko a akusá Doran di a kometé e krímen.
Doran a atmití su kulpa i a bisa ku el a hasié komo defensa propio.
Tur kos tabata debí na un chansa ku e víktima lo a hasi, ku e akusado i ku no a kai den masha bon tera serka dje.
Segun e akusado, e víktima lo a lag’é keda laf den hende.
Despues di un interkambio di palabra, e víktima a bira lomba subi su bròmer i bai for di e sitio.
E akusado na su turno, a drenta su outo, bira bèk i bai kas di e víktima.
Na momento ku el a yega, e víktima a sali pafó ku algu den su man, di kual e akusado a lòs 4 bala dirigí riba dje ku a kousa su morto.
Segun deklarashon di Doran, e víktima a sali bin ku un duki kòrá i un arma, mek riba dje i trèk e gai pero bala no a sali.
Despues di a purba un par di bia, el a saka su arma i lòs bala riba e víktima ku e konsekuensia fatal.
Durante di e interogashon di e akusado na polis, el a bisa ku su primu a sake for di su kueru dun’e hopi rabia pa motibu ku el a rebah’é dilanti tur hende.
Tambe e akusado a bisa ku ora nan tabata diskutí , e víktima lo a bisa ku e ta bai kas bai kue e arma.
Na polis i durante tratamentu di e kaso, e akusado a bisa ku su intenshon no tabata pa tira su primu mata, pero pa spant’é.
E akusado a bisa ku e víktima tabatin un arma di kandela i ku despues di e suseso, famianan a sali kue arma skonde. Polisnan no a haña niun arma a e sitio.
Abogado general a pidi hues pa rechasá e ponensia di e akusado ku el a usa defensa propio. El a demandá e akusado na 16 aña.
Aki 3 siman e tribunal lo dikta sentensia.