WILLEMSTAD.- Ministerio Públiko ayera den korte di apelashon a pidi 18 aña pa Eric Martina di 73 aña di edat kondená pa homisidio, intento di asesinato na vários okashon i uso di arma ilegal. Den korte di promé instansia Martina a keda kondená na 12 aña di prizòn.
Martina ta keda akusá di a tira su propio subrina Maeva D. Martina nase na Kòrsou dia 8 di yanüari 1993, mata na Kokori dia 26 di desèmber 2018, na momento ku el a lòs diferente bala riba un otro subrino, despues di un forsageo entre nan dos.
E bala a alkansá e víktima ku nèt na e momento ei a sali pafó ku e konsekuensia fatal.
Martina a keda kondená na 12 aña despues ku fiskal a pidi 18 pe.
E akusado a apelá su sentensia pasó e ta haña ku pa su edat e kastigu ta demasiado haltu.
Ayera abogado general a bolbe hasi demanda di 18 aña pa e akusado, meskos ku korte di promé instansia. E abogado general a haña e akusashon probá i Martina kompletamente responsabel pa su akto.
Segun e deklarashonnan, e problema a kuminsá fo’i dia 24 di desèmber, entre e akusado i su subrino Shanon. Martina a yega kas i haña dos bisiña tabata negoshá pa kumpra 4 kabritu serka Shanon pa dianan di fiesta.
Esaki a pone ku e akusado a rabia inmensamente pa motibu ku e kabritunan ta di dje i no di Shanon.
Segun testigunan fo’i einan a surgi un diskushon, kual e akusado lo mester a menasá Shanon ku arma kandela. E problema a eskala 26 di desèmber despues ku a surgi un bringamentu entre e akusado i e subrino.
E akusado ku tin pèrmit pa arma, a bai bin bèk kue su arma i los tirunan den direkshon di e subrino, pero a alkansá e víktima.
Abogado Vaders a bisa ku Martina a haña hopi sla den su kabes durante e forsageo di su subrino kual esaki a pone ku el a bira inkonsiente.
Su wowo a bira skur i a pone ku el a kometé e akto.
E abogado a pidi pa tene kuenta ku edat di e akusado i tambe su salú i tambe ku e ta “first offender”.
Aki 3 siman Hof lo dikta sentensia.