WILLEMSTAD.- E hòmber A.G. ku tabata traha komo seguridat na Refineria Isla ayera a sali di bon for di un kaso di tiroteo ku a tuma lugá 14 desèmber 2018 durante ora di trabou.
E ta keda akusá di a tira riba un hòmber 2 bia den su pia. Segun e deklarashon e dia ei e akusadó tabata trahando i tabata den e kas di pòrtir.
Dado momento el a haña mèldu serka un trahadó ku un hòmber a kaba tira atrako riba su kolega, kita su tas ku sèn for di dje.
Segun e víktima, e tabata kana den área di pòst 5 i a mira e akusado tabata bin su tras. El a kana duru kita bai direkshon di Pinosweg. E akusado a bin su tras grit’é para, el a sigui kana. E akusado a tira den laira pa despues lòs dos tiru dirigí riba su pianan.
E no sa pa kiko, pasó e no a kometé atrako i no a hañ’é ku arma ni nada hòrtá.
E akusado a bisa ayera ku e tabata pará na e kas di pòrtir ora e kolega a bin bis’é bo ta mira e gai na pretu ku ta kana bai ei ku e tas pretu, el a kaba di tira atrako riba Beto.
Segun e akusado e ta un “buitengewone agent” i a sali aktua ora el a haña e informashon. El a splika ku e tabata kana tras di e hòmber el a mira ku e tabatin su man den su tas i dado momento a hasi un moveshon sospechoso i p’esei a aktua den defensa propio.
Esei a pone ku el a lós un tiru di atvertensia den laira i despues dirigí pasó e hòmber no kier a para.
Hues a bis’é ku ta promé bes el a deklará esei pasó na polis el a papia otro kos. Niun momento so el a bisa ku e hòmber a hasi un moveshon sospechoso.
Hues a splika ku e víktima a pèrdè hopi sanger i pa hopi ratu a keda ku problema di su pia.
E akusado a keda será fo’i 14 di desèmber 2018 te ku 3 di yanüari 2019, pendiente pa su kaso keda tratá.
Fiskal a haña e akusashon probá i a demandá e akusado na 18 luna kual 9 kondishonal, periodo prueba di 3 aña. Fiskal a bisa ku no tabatin niun motibu pa tira riba e víktima pasó e no hasi nada pa tir’é.
Segun fiskal e akusado no a deklará ku el a mira e víktima ku arma ni a mir’é tira atrako. Mirando tur esakinan fiskal a yega na e demanda ariba menshoná. Segun fiskal e manera ku e akusado a aktua no tabata esun di mas mihó.
Hues Verbeek a desviá for di e demanda di fiskal. Hues a bisa ku e ta tene kuenta entre otro ku e akusado no tin karchi kastigu pero no a aktua den e mihó manera. Mirando tur esakinan hues yega na e kondena di e kastigu máksimo di trabou ku ta 240 ora trabou mas 1 aña kastigu prizòn kondishonal mas 2 aña di prueba.