WILLEMSTAD.- Fiskal mr. Koert ayera a hasi un demanda di 24 aña pa e akusado Christefer Martina .

Martina ta keda akusá di ta esun responsabel pa e dòbel asesinato den kaso “The Alley”.

Fiskal a duna di konos’é ku den prinsipio Martina a hasi uzo di su derechi keda ketu, pero awor  ta bisa ku e no tin nada di aber ku e asesinato ni e arma di kandela.

Fiskal a papia di e deklarashonnan di e bewaker Frans ku a deklará kon Martina a aserk’é i menas’é pa hinka e arma den e diskoteka pe.

Segun fiskal por a mira Martina bèrdat aserká Frans riba imágennan di bon kalidat di e kámaranan den Punda.

Tambe fiskal a papia di e deklarashonnan di Martina su amigu, ku ta e akusado Lindeborg ku a deklará di a rekonosé e arma ku polis a konfiská, komo paresido na esun ku Martina tabatin den su kamber i tambe paresido na esun ku Martina a laga kai e anochi ei den Heerenstraat, promé ku nan drenta den e diskotèk.

Segun fiskal Confensor a deklará di a tuma un tas ariba bèrdat serka Frans i poné riba mesa, pero e no tabata sa ku  den e tas aki tabatin arma.

Riba esaki fiskal a bisa ku el a apelá e sentensia di Confesor i de Jongh, despues ku hues di korte di promé instansia a apsolvé nan di tur kulpa.

Fiskal a remarká tambe kon bon por a mira Confesor i de Jongh subi nan skuter i bandoná e sitio, despues di e suseso, pero despues ta mira nan bolbe pasa atrobe den kaya.

Segun fiskal ayera, tabata komo si fuera ku e pareha tabata en buska di e akusado Martina ku ya a bandoná e sitio.

Fiskal a bisa ku e akusashon ta legalmente i konvinsentemente probá.

Fiskal a relatá ku dia Martina tabatin 16 aña, el a keda kondená pa un kaso di intento di homisidio i homisidio na 2008, kaminda e akusado tabata manehá un vehíkulo i a kore bai dal dos hóben riba skuter intenshonalmente, di kual un di nan a pèrdè su bida i e otro a keda praktikamente inválido.

Martina mester a keda den instituto GOG e tempu ei, te dia el a hasi 21 aña.

Tambe el a keda kondená  pa arma i atrako den bibienda.

Mirando tur esakinan fiskal a bisa di ta yega na un demanda di 24 aña di kastigu, mas daño perhuisio di 60 mil florin pa mama di e dama víktima.

Dia 20 di desèmber korte lo dikta sentensia pa 2’or di mèrdia.