WILLEMSTAD.- Fiskal ayera a hasi demanda di 7 aña mas 1 aña den Brasami pa Rodolfo Elstak (40),9 aña pa Limar “Nito” Mongen i 8 aña pa Cristino “Niño” Oleana.
Korte di promé instansia ayera a trata kaso di e atrako ku a tuma lugá na altura PSB kaminda e hòmbernan a bai ku 192 mil 525 florin for di e propietario di Tu i Yo Lottery dia 2 di yüni último. Relashoná ku e kaso un dia promé, un hòmber di e fam Nita a bira víktima, despues ku e akusadonan a blòki’é, batié i bai ku su vehíkulo ku a wòrdu usá pa fuga despues di e atrako na PSB.
Tambe korte a trata kaso di atrako riba un pareha turista kual Elstak ta keda akusá di dje. E akusado Mongen ta keda akusá tambe di a agredí e hòmber S.N. den sèlnan di Barber ku un djùk di eis den su kabes.
Ministerio Públiko ta akusá tur e 3 hòmbernan di a kometé e atrako riba e víktima di fam Nita. Segun Ministerio Públiko, Oleana i Mongen a kometé e atrako di 192 mil florin riba e doño di Tu i Yo Lottery, miéntras e dos akusadonan femenino, I. Oleana (22) i N. Rojer-Balentina (22) ta esnan ku a fasilitá e fuga, despues ku nan a para warda e hòmbernan. Ayera e akusadonan femenino no tabata tei presente pa motibu ku nan kaso lo wòrdu tratá apart.
Elstak ku no ta den e akusashon di e atrako di 192 mil florin, direpente a lanta bisa durante e kaso di pro forma anterior, ku e ta esun ku a kometé e atrako.
El a pidi hues pa laga tur hende bai kas. Hues a para e kaso pa Elstak wòrdu skuchá na polis. Elstak a deklará ku un chamo a bis’e pa nan bai kometé e atrako. El a bisa Mongen un dia promé i nan a bai na e parkeerplaats di Goisco pa wak e komersiante. Despues Mongen a ninga i a bisa ku e ta hala tras. Segun Elstak e ku e venezolano so a bai. E ta esun ku a ranka e tas for di e komersiante i dal e ku pipa. Ora ku polis a konfront’é ku e deklarashonnan di e víktima, e detayenan no tabata kuadra ku loke e a deklará. Fiskal ta sospechá ku Elstak kier a tuma e kulpa riba dje.
Ministerio Públiko ta akusá Mongen i Oleana di ta esnan ku a baha pone arma na kabes di e komersiante i kita su sèn for di dje. Nan a menas’é pa keda ketu sino nan lo tir’é mata. Despues nan a agredié ku e arma den su kabes i lag’é tur na sanger. Mongen a wòrdu rekonosé debí ku e no tabatin kara tapá.
Hues a splika, ku polisnan via imágennan di kámara a mira kon Mongen ta drenta e vehíkulo di fuga di e dama despues ku e atrako tuma lugá den área di Kwartier. Na polis e akusado femenino Oleana a deklará ku un dia promé Mongen a bis’é pa ku e tin un ganga di bai kome riba lugá di parker na Goisco i ku e lo tin ku yud’é. Mainta el a manda e alokashon pa e dama pa busk’é. Oleana a bisa ku ora el a bai buska Mongen, e tabata huntu ku Cristino. Mongen tabatin un tas den su man i a bis’é ku ta un persona ku ta stòrt hopi sèn a dun’é e informashon. Banda di esei, Mongen a bis’é ku e mester duna un otro hende e maleta di sèn. Mongen a pidié pa bende òf spùit e outo i el a pidi Mongen 13 mil florin. Mongen a bis’é ku e dun’é e sèn, e no ta keda ku nada i ta sèn pa e por invertí den kunuku. Despues di esei nan a kore bai Ronde Klip. Mongen a keda para riba ku en deklarashon di e dama ku e tin un aventura kuné, no ta bèrdat. Durante tratamentu di e kaso den pro forma, Oleana a bisa ku ora el a wòrdu detené el a spanta i papia hopi kos ku no ta kuadra. Fiskal a haña tur e akusashonnan probá. Fiskal a bisa ku te awe no sa kiko a pasa ku e botin. Fiskal a splika e dañonan ku a keda hasí na e víktimanan ku te awe keda ku trouma. Anita su outo ku e ta hiba su yunan skol, tambe no ta sirbi. Mirando tur esakinan fiskal a yena na e demanda di 7 aña pa Elstak, 9 aña pa Mongen i 8 aña pa Oleana. Dia 25 novèmber korte lo dikta sentensia.