WILLRMSTAD.- Fiskal Hato- Willems ayera den kaso asesinato Solar mihó konosí komo kaso “De Zon” a hasi demanda di 20 aña pa Sherwin (Pumpi) Pieters (19) i Druwently (Droopi) Pieter (28) komo esnan ku a kometé e asesinato, miéntras pa Yu Liang Wu (22) fiskal a pidi 12 aña pa kómplise di asesinato dor di duna e akusadonan arma i pa Jerrel Nivillac (30) 24 luna akusá pa poseshon di arma. Ta trata di e kaso ku a tuma lugá dia 22 di yüni aña pasá  kual e víktima Idrick Sebastian Francisca, nasé na Kòrsou dia 20 di yanüari 1995, a keda likidá ku un arma di  kandela di un forma misterioso.

Despues ku hues van Lieshout a kaba di skucha e akusado Jerrel Nivillac (30) apart, el a laga e otro ko akusadonan drenta den sala pa trata nan kaso. Pa seguridat a laga Nivillac sinta apart for di e otro ko akusadonan, mirando ku el a duna deklarashonnan inkriminatorio. Ministerio Públiko ta akusá tur 4 pa asesinato i kómplise di asesinato. Nivillac den su promé deklarashon den sala di korte dia 10 di yanüari último a bisa ku a asesiná hende robes. Nan tur a kometé un fayo i ke pa e otronan tambe aseptá esaki.

Riba e pregunta di hues na e 3 akusadonan Pieter, Pieters i Wu si nan tabata na e sitio di tiroteo e anochi ei, Pieters a bisa ku e ta inosente i no tin nada di aber ku e kaso. Wu a hasi uso di su derechi keda ketu, miéntras Pieter a  bisa ku tur dia e ta ei nan i e anochi ei tambe.

Hues a bisa ku segun e dosié Wu a duna Pieter arma. Pieter a bisa ku Nivillac a dun’é arma, pero e no a tum’é.

Segun Pieter, Nivillac ta gaña ku el a mir’é mek arma riba e outo di e víktima ora ku el a pasa, pero esei no ta kuadra.

Pieters tambe den e kaso aki a hasi uso di su derechi keda ketu.

Riba imágennan di kámara por a mira kon Pieters ta tuma algu serka Wu. Ora hues a puntra Pieters kiko el a tuma, el a bisa cheiba i no sa nada di arma.

Hues a bisa Pieters ku polis  por a mira klaramente ku ta arma e loke e tabatin den su man ta.

Pieter a duna di konosé ku Nivillac ke traha su istoria i ta gaña tur loke el a bisa.

Hues mas aleu a duna di konosé ku den promé Nivillac a gaña ku el a tira e arma na landfill, pero despues a konta ku el a laga chief bende pa 1700 florin pa e haña sèn pa  rekonosé su yu muhé.

Hues a sigui bisa ku Nivillac a hasi denunsia kontra Droopi pa menasa. Segun Nivillac nan a bai un kaminda i Droopi a bisa un gai rasta den presensia di un polis pa pega riba dje.

Droopi na su turno a bisa ku  e tabata konosé e defuntu  pasó e mes a yega di bis’é ku nan lo ta famia, pues no tin motibu pa el a  tir’é ni kai den pániko ora ku nan a mir’é. Segun Droopi, Nivillac ta esun mas sospechoso, mirando kon hanshá e tabata i asta a saka arma.

Nivillac a bisa ku el a  haña aksidente i a risibí 60 mil florin pero debí ku tin yen gai egoista den bario, el a disidí di kumpra e arma pa defendé su mes. El a kumpra dos fundeshi pa su yunan tin un kas. Hues a sigui bisa ku a haña 2 patronchi di bala den apartamentu di Wu durante entrada hudisial. Riba esaki tambe Wu a keda ketu.

Fiskal a bisa ku e víktima a ser asesiná den flor di su hubentut. E akusadonan e dia ei tabata  den un momento di pániko despues ku a kaba di asesiná un di nan su famia. Segun fiskal e deklarashon di Nivillac kontra e otro ko akusadonan ta kuadra presis ku e investigashon. Mirando e imágennan, prosèsverbal di polis i deklarashon di Nivillac e ta haña tur 4 kulpabel. Mirando tur esaki el a pidi 20 aña pa Pieters i Pieter, 12 aña pa Wu  i 24 luna pa Nivillac. Aki 3 siman hues lo dikta sentensia.