Demanda di bida largu pa “Diablo” pa likidashon den prizon

WILLEMSTAD.- Awe, djabierne 2 di november 2018, djis algun ratu pasá,  Fiskal di Ministerio Públiko (OM) Kòrsou a hasi demanda di kastigu di bida largu (levenslang) pa e homber C. “Diablo” W.  nase na Republika Dominikana, 1975. E ta ser sospechá pa OM di asesinato premedita (voorbedachte rade) di detenido Kenroy “Maná-Maná” Stefania dia 30 di yüli 2012 dilanti sel 206 den Blok 4 di prison di SDKK.
E viktima “Maná-Maná” a ser likidá e dia en kuestion ku un arma di kandela pa 4 bala kaliber .38. OM ta yega na e konklushon aki a base di outopsia i a base di diferente testigu di e asesinato.
Fiskal di Ministerio Públiko a bisa awe den Korte ku mester protehá komunidat di C.W. ku ta ser konsiderá komo un homber hopi peligroso. E ta sintando ya kaba un kastigu di prison di 15 aña pa un otro kaso di asesinato. “Bida largu ta apropiá den e kaso aki”, di akuerdo ku Fiskal.
Famia di defuntu Stefania a entregá na Wes awe mainta un demanda pa daño perhuisio di 50.000 florin. E maksimo ku por pidi den un kaso penal.

SHARE

LEAVE A REPLY