WILLEMSTAD.- Ministerio Públiko awe tardi despues di un presentashon di kasi seis ora finalmente a hasi un demanda di bida largu den e notorio kaso denominá komo ‘Themis’ i den kual tin Urvin “Nuto” Wawoe komo úniko akusado. Nuto ta ser akusá di 14 diferente krímen, kualnan ta varia di likidashon di un kantidat di persona, intento di asesinato, trafikashon di droga i di ta pertenesé na un organisashon kriminal. No ménos ku tres fiskal a presentá e kaso aki i kada un a enfoká riba un parti di e akusashon. T’asina ku henter e kaso aki i e investigashonnan rondó di dje a start na yüli di 2014 ku e kaso di Hato Shooting den kual a kita bida di Erwin Juliana alias Jais. Desafortunadamente no solamente Jais a pèrdè su bida, sino tambe Shantley Arnhem a paga karu. Aparte di nan un kantidat di shete otro persona ku a yega Kòrsou komo turista a risibi tiru na diferente parti di nan kurpa.
Den e kaso aki, ku ainda tin un siman mas pa e konkluí ku presentashon di Ministerio Públiko i abogadonan, Nuto ta ser akusá di ta miembro di No Limit Soldiers (NLS), i tambe ku e tabata un dje lidernan huntu ku Tyson Quant. E kaso di Hato Shooting supuestamente lo tabatin di haber ku un ‘rip deal’ den kual miembronan di e geng Buena Vista City lo a hòrta 40 kilo di mariwana di NLS. Jais a ser likidá komo esun responsabel na kabes dje geng.
E kasonan mas pisa di likidashon a bini despues di e asesinato di Latoya Flanders ku ta frei di Nuto. E krímen a tuma lugá dia 5 di novèmber 2015. Den e periodo di akuerdo ku kombersashonnan ku a sigui di e akusado a asumí ku e lo duna òrdu pa likidá un kantidat di hende aya na St. Maarten. E asesinato di Latoya a sosodé miéntras Nuto tabata sera na Point Blanche.
TRAFIKASHON DI DROGA
Tin tambe tres akusashon kontra Nuto pa trafikashon di droga, den e kaso aki di eksportashon di 30 kilo, 140 kilo i 172 kilo. Den e kasonan aki Nuto a nenga i durante henter e kaso a hasi apelashon riba su derechi pa keda ketu (zwijgrecht). E lotenan lo mester a pasa riba diferente ruta ku e inkluí Korsou, Jamaica, St. Maarten, Hulanda, Fransia i Belgika.
Despues di e demanda aki di Ministerio Públiko, e plataforma ta liber awor pa e tres abogadonan di Nuto trese nan defensa.