WILLEMSTAD - Pa algun luna kaba, Aqualectra ta den trayekto pa mehorá nos ret di seguridat pa henter Kòrsou. Ayera nochi, un dado momento e demanda di koriente riba nos a tabata hopi haltu. E sub-stashon akí, ta un di e 13 trafonan ku ta supli koriente pa nos isla. Dor di e demanda haltu di ayera nochi, e sistema di seguridat riba e sub-stashon a kai afó i a pone ku barionan konektá riba e ret akí a keda sin koriente.

Mesora téknikonan a sali pa traha riba esaki i rekonektá koriente mas lihé posibel pa kasnan den e área. Sinembargo, e demanda tabata asina haltu ku koriente a bolbe kai afó despues ku nos téknikonan a logra rekonektá.

Na dos okashon, téknikonan di Aqualectra a purba pa subi kapasidat riba e sub-stashon di Montaña i bolbe rekonektá. Pero dor di e demanda di koriente den e área, koriente a bolbe kai afó ámbos bia. En total e área a keda sin koriente pa masoménos 3 ora durante oranan di anochi lat ayera.

Aqualectra ta komprondé ku e orario ku esaki a tuma lugá i e echo ku koriente a kai afó tres bia, no tabata un situashon agradabel pa e kasnan ku a keda afektá i di kurason ta pidi diskulpa pa esaki.

“Na e momentunan akí, nos a konektá un parti di e klientenan riba un otro sub-stashon, di moda ku tur kas den e área por a risibí koriente bèk. Ku esaki, nos ta premirá ku e koriente lo no bolbe kai afó den e área akí.”