Dòkter Roland Kock Optima Arbodienst

WILLEMSTAD.- Ora nos ta papia di kua grupo di trahadó tin mas reklamo di salú, dòkter Kock a bisa ku e tin di wak loke ta kai serka nan di Optima, kaminda nan ta atendé mas ku e sektor bankario, trust i finansiero i kuido.

Dòkter Ronald Kock ta Bedrijfsarts na Optima Arbo dienst i el a mustra riba e situashon di malesa di trahadónan i un di nan ku sigur meresé atenshon ta Burnout. Te ainda demasiado trahadó, 5% serka nan di Optima, ta kai afó debí na Burnout. Ounke el a referí mas na esnan di e sektor finansiero i kuido ku nan di Optima ta atendé kuné.

E no tin idea di esnan ku ta traha den tienda. Pero el a ripará si ku nan trabou ta hopi dirigí riba e parti mental.

Hopi di e konsultanan ku e ta hibando ta ku hendenan ku problemanan mental i síkiko. E por ta varia di ‘burnout’ te depreshon, pero hopi ta keda afektá awendia. Si ántes tabatin hopi hende ku doló di lomba, awendia ta  hendenan ku problema síkiko i mental.

Si ta trata di un trahadó ku problema di lomba, hopi bia tin un diagnóstiko kaba i e sa kon trat’e i sa tambe kon lihé por haña e hende ei bèk na trabou. Ounke e tin di remarká ku no pasobra e persona ku a bin ku algu na su kurpa no ta nifiká ku tin problema di salú mental su tras. E parti na kurpa ei ta un kaminda pa drenta pa bai wak mas leu serka e trahadó.

E parti síkiko hopi bia e hende ta bin pero e diagnóstiko no tei ainda. E hende ta bin ku hansha, strès, e no ta drumi bon anochi i ta ora ta atendé ku e trahadó por saka afó kiko ta pasando. Ta netamente aki e ta bira mas difísil pa atendé, pasobra tin e problema den kuido aktualmente na Kòrsou ku ta difísil pa haña sita serka sikólogonan. Pa por haña un sita hopi bia ta dura masha largu. I ta danki dios tin otro forma pa yuda hende manera trahadó sosial, pero e falta di sikólogo ta hasi e situashon difísil i ta kondusí ku e apsentismo por bai dura mas largu.

Dòkter Kock a sigui bisa ku nan semper lo ke pa e trahadó por bai traha mas lihé posibel, pero no por pusha un trahadó pa bai traha si e no ta kompletamente salú. ”Trabou i traha ta bon pa hende pasobra bo ta sosialmente besig, bo balor propio tambe ta bin ora bo ta produsí pa e komunidat aki. I mester ta bon kla ku un hende na kas no ta fakansi e tin”, el a aklará.

I ora ta papia di e problemanan mental serka e trahadó, dòkter Kock a enfatisá ku awendia hopi hende ta bin ku ‘burnout’.  Ora e tira bista riba e lista ku nan ta atendé kuné, un di kada 20 kontakto ta bin ku ‘burnout’. Esaki ta 5% di e kantidat di diagnóstiko ku nan tin. I e ta trese kuné ku hopi hopi bia e ta dura largu, e por trese konflikto den trabou, konsekuentemente e ‘burnout’ por bira depreshon si e no haña e yudansa adekuá. Esaki por sòru pa konflikto den trabou, pasobra e trahadó por keda basta luna for di trabou i lástimamente hende ta pèrdè trabou. I esaki segun dòkter Kock no ta bon ni pa e trahadó ni pa e doño di trabou.

Loke tambe dòkter Kock a pone atenshon riba dje ta ku un konflikto laboral no ta wòrdu konsiderá komo malesa, den lei di SVB. Na momentu ku e hende presentá ku esaki komo problema, e tempu di AO ta bira masha kòrtiku. I miéntras SVB ta para e AO e dòkter (arbeidsarts) si ta haña ku e hende no por bai traha. E situashon ta trese kuné ku mester bai negoshá ku e doño di trabou kiko por hasi pa tene e hende na kas. Si ta kompania grandi por apsorbé pero no un kompania chikí.

Un hende ku ‘burnout’ por dura luna i asta añanan. ‘Burnout’ ta algu severo pasobra ta un proseso di strès di basta largu ta kondusí na esei. E kansansio ta e síntoma prinsipal i e hende mester buska e grep bèk riba su bida. E por dura mínimo 3 luna pero e por dura muchu mas largu. I den kuadro di nos leinan laboral si un hende ta mas largu ku un aña malu, e por ta indikashon pa SOAW duna pèrmit pa kit’e for di trabou.