WILLEMSTAD.- Ayera Brantwer Kòrsou a publiká nan sifranan pa aña 2020. Un total di 1288 asistensia brantwer a duna den 2020. E total di asistensia pa aña 2020 a keda registrá na 1288 bes. Brantwer ta konosé un bahada mínimo di kasonan, si por kompará ku aña 2019 ku a registrá 1293 kaso. Na aña 2018 e kantidat tabata 1311 i na 2017 e tabata 1082 kaso.

For di e sifranan por tuma nota un subida den e kantidat di edifisio i kas ku ta kima henter aña. Un oumento drástiko na yüni 2020 ta debí na e 3 dianan di disturbio ku Kòrsou a konosé i ku Brantwer Kòrsou mester a atendé ku un kantidat rekòr di kandela. Esaki ta alrededor di 222 asistensia pa paga kandela di disturbionan.

Durante aña 2020, Brantwer tabata mas aktivo durante e di dos kuartal di aña. Posiblemente esaki lo por ta relatá na COVID-19, kual a pone ku tabatin mas tantu persona na kas, i mas chèns pa eror humano ku ta kousa kandela. E luna ku ménos asistensia di kandela durante aña 2020 ta novèmber.

Durante aña 2020 otro oumento ku tambe Brantwer Kòrsou a registrá ta e kantidat di kasnan ku ta kima. Durante aña 2020, un total di 97 edifisio a keda registrá, for di kual 55 tabata un kas.

Na aña 2017 tabatin un total di 106 edifisio ku a kima, for di kual 58 tabata na kas. Na aña 2018 a registrá 100 edifisio for di kual 60 tabata un kas. Aña 2019 a konosé un bahada den e sifranan, na momentu ku a registrá 69 edifisio na kandela, for di kual 44 tabata un kas, pero ku na aña 2020 a bolbe oumentá na 55 na kandela.

Lamentablemente durante aña 2020 a konosé 3 víktima a konsekuensia direkto di kandela òf eksploshon. Na luna di sèptèmber 2020 un víktima a fayesé a konsekuensia di kandela. Na novèmber 2020 un víktima ta fayesé a konsekuensia di un eksploshon di gas, miéntras ku na desèmber 2020 tambe un otro víktima ta fayesé a konsekuensia di kandela.

E investigashonnan di tur tres kaso ta keda kondusí pa departamento tékniko forensiko di polis.

Na 2020 Brantwer Kòrsou mester a atendé ku 24 kaso di “uitslaande brand”. Luna di yüni 2020 ta resaltá ku 4 “uitslaande brand” den sifranan, na momentu ku durante di e disturbio nan mester a atendé ku entre otro un edifisio komersial na kandela, un kas no habitá i tambe un lokal di un skol.

Ta importante splika ku no ta tur kandela ta kousa daño kompletamente. Tin diferente kandela (parti paden) ku ta kousa daño na un parti di e kas/edifisio i tin kandela tambe ku Brantwer Kòrsou ta duna asistensia na kual e daño nan tabata mínimo. Pa aña 2020 a registrá 71 kaso en total di e tipo di kandela aki.

Durante aña 2020, brantwer Kòrsou a kontinuá ku énfasis riba e kampaña aki pa stimulá redukshon di kandela den bibienda i tambe stimulá prevenshon di kandela den komunidat.