WILLEMSTAD.- Wardakosta Karibense den aña 2023 a interseptá ménos transporte di droga kompará ku 2022. Esaki ta skibí den e relato anual di Kustwacht ku minister di Defensa hulandes Kajsa Ollongren siman pasá a manda na parlamento hulandes.

Den e karta Ollongren ta skibi: “E kantidat di droga interseptá den 2023 ta mas abou ku 2022. Esaki por ta relashoná ku e disponibilidat variabel di e ‘stationsschip’ ku un helikòpter durante e aña pasá.” Segun Ollongren e stationsschip ku helikòpter ta masha bon ekipá pa e tareanan di Wardakosta. Disponibilidat di e stationsschip den Karibe tin su efekto riba e totalidat di droga ku ta wòrdu interseptá, segun Ollongren.

Tambe minister ta skibi ku na 2022 a instalá stashonnan di radar (‘wallradarstations’) na uso, ku esaki Kustwacht ta tene kuenta na posibel kambionan den e manera kon kriminalnan ta transportá droga.