WILLEMSTAD.- Aki dos pa tres siman Kòrsou lo haña un gobièrnu nobo. Un gobièrnu ku partidonan tambe diferente.  E 4 aña di e gobièrnu aktual a pasa den hopi reto manera minister di finansa Kenneth Gijsbertha a bisa EXTRA.

“Si no tabata esun ta e otro”, asina el a reakshoná, dunando un indikashon kon e 4 aña di gobernashon a bai.

Tabata 4 aña di lucha tras di lucha i tur hende ku ta sigui e desaroyo ku nos pais a pasa aden por konkluí ku si no tabata esun ta e otro. “Nos tabata den situashon di Inselair i konektividat ku no tabat’ei i tur e konsekuensianan, nos a haña ku offshore a terminá i a pone ku mester a hasi lo máksimo pa wak ku tòg por mantené e sektor finansiero aki di forma bibu, ku e por sigui kontribuí na kaha di gobièrnu i kuponan di trabou”, segun minister Gijsbertha.

Gobièrnu a logra tòg di forma satisfaktorio di trese asina tantu kambio den leinan fiskal, ku di OECD nan a konsiderá ku Kòrsou a kambia leinan i gobièrnu ta konforme ku e standart di OECD i  a risibí denominashon di ‘largely compliant’, ku tabata sumamente importante pa e sektor finansiero i despues tambe Kòrsou a keda di ‘toets’ dor di EU, ku einan tambe gobièrnu tabata satisfaktorio. Einan tambe un otro reto dilanti gobièrnu, ku a logra skapa e parti di e sektor finansiero.