WILLEMSTAD.- Apesar dje situashon di pandemia di Covid-19 ku tabatin 2020 den su gara, e instituto di Ombdusman a haña bastante keho. E petishonnan den 2020 ta mas tantu kompará ku aña 2019.

Den 2020, mas tantu hende muhé a entregá keho/petishon na Ombudsman esaki ta sali na kla den e Relato Anual. Den 2020 Ombudsman a risibí 842 petishon di siudadanonan i organisashonnan. Un kantidat di 358 hòmber a entrega keho i 460 hende muhé. Tambe tabatin 3 grupo ku a entregá petishon, personanan hurídiko ta 8, investigashon “Ambsthalve” ta 1, 7 karta di preokupashon i 5 petishon anónimo.

Di e 842 petishonnan, 428 ta kai dentro di e outoridat di Ombudsman di kual 398 a keda solushoná i ainda tin 130 den tratamentu.

E petishonnan ku no ta kai den outoridat di Ombudsman, pero ku si a keda trata den konsulta ku e kompania òf fundashon di gobièrnu (promé ku kambio di Lei), ta 414. Di e kantidat menshoná, 358 intervenshon a keda solushoná i tin 29 ainda den tratamentu.

Un kantidat di 27 petishon ku o ta kai bou di outoridat di Ombudsman, a keda manda pa e instansianan konserní.

Den 2020 e servisionan di gobièrnu ku mas keho a keda trata dor di Ombudsman ta Domeinbeheer ku 29 petishon, Inspekshon di Belasting 27 petishon.

Na Kasnan di Bario e petishonnan ta haltu ku 33 kaso, i di Kuerpo Polisial di Kòrsou tambe ta haltu ku 29 kaso.

E Sektor Sociale Ontwikkeling tambe tabatin un kantidat rekòr di keho ku a keda trata kual ta 49. Registro Sivil tambe tin un kantidat haltu di petishon ku ta 18. Fundashon Kas Popular ta otro dje fundashonnan di gobièrnu ku den 2020 tabatin 16 petishon den su kontra i ku a keda trata.

Un bista di spesifikashon di kada ministerio ku keho a keda entregá na nan na Ombudsman ta: SOAW tabatin mas tantu ku 105, sigui pa ministerio di hustisia 75, i na di tres lugá VVRP 61, Minister di finansa 50, 48 ta otro órganonan di gobièrnu, BPD ta 29, GMN ta 22 keho, MEO ta 20, Ministerio Enseñansa 9 keho i ministerio di Asuntunan general ta 9 keho.