WILLEMSTAD.- Sekretario di estado di Hulanda pa Relashon di Reino, Raymond Knops, a manda karta na parlamento hulandes (‘Tweede Kamer’), relashoná ku pakete di emergensia i ekonomia pa Kòrsou, Aruba i Sint Maarten.
Segun Knops pandemia di COVID-19 ‘te ainda tin konsekuensianan hopi grandi pa Kòrsou, Aruba i Sint Maarten. Segun Knops e islanan lo sinti e efektonan di e pandemia pa basta tempu mas.
Segun Knops pa e motibu ei tambe den aña 2021 Hulanda lo sigui duna yudansa finansiero pa e tres islanan. ‘Esaki tin komo konsekuensia ku gastunan pa e paisnan ta sigui tambe.’ Knops a informá parlamento hulandes ku Hulanda a yega na un akuerdo ku e tres paisnan relashoná ku e ‘paketenan di medida’ (landspaketten).
Den e paketenan e paisnan a bai di akuerdo ku diferente reformanan ‘ku tin komo meta pa fortifiká resistensia di e paisnan riba tereno di finansa, ekonomia, solides institushonal i solides sosial’, Knops ta skibi den su karta. Segun e sekretario di estado meta di e reformanan ‘ta ku den futuro e paisnan no mester pidi Hulanda yudansa mas si un kalamidat ta tuma lugá, pasobra nan lo tin sufisiente reserva riba nan mes.’
Introdukshon di e reformanan ta nesesario pa e paisnan por haña sosten di likides, Knops ta skirbi. Minister-presidente Eugene Rhuggenaath resientemente a splika ku ‘Hulanda a ofresé pa yuda bou di algun kondishon. Un di e kondishonnan aki ta institushon di un Caribische Hervormingsentiteit (CoHO) pa medio di e Lei di konsenso i tambe ehekushon di e asina yamá ‘landspakket’ ku ta kontené reformanan struktural.’
Segun Rhuggenaath e ‘landspakket’ ta reflehá den liña grandi loke Kòrsou mes a proponé den su Strategia di Kresementu i seguidamente den e programa di reforma (hervormingsprogramma). Pa e motibu Rhuggenaath por a bai di akuerdo ku e akuerdo ku ta yama ‘landspakket’.