Anoushka Westmaas

“Semper mi tabata un hende ‘handig’. Mi gusta kolo, mi gusta fiesta i mi gusta mira kos bunita”, Anoushka Westmaas a bisa. El a hasi dòrnamentu su pashon i su hòbi. Anoushka a konta Djasabra ku e tabatin algun amigu ku ta bende kosnan di adorno i den e kaso aki tambe kosnan di Pasku. E tabata bai yuda nan i den e yudamentu el a kuminsá dòrna un kèrstbom i esaki i esaya. E tempu ei no tabatin Pinterest manera awor aki i bo mester ta mas bien nase ku e habilidat i e pashon pa dòrna. E tabatin masha bon bista di kolo i dekorá i asina el a kuminsá ku dekorashon. I asina el a drenta den dekorashon. Anoushka tabata hasié e tempu ei pa su amigunan so i na su kas.

5 pa 6 kèrstbom na mi kas....

Na su kas tabatin 5 pa 6 kèrstbom. Esaki pasobra su yunan tambe ke dekorá kèrstbom i kada un ta dekorá nan kèrstbom i ora e muchanan bai drumi e ta hasié na su manera. E kos a bai bon algun aña te ora su yunan a kuminsá haña tinu i e yunan a ripará ku no ta asina nan a dekorá nan kèrstbom. El a inventá e esküs ku kabai di Sinterklaas a bin i dal e kèrstbom abou i e mester a dekorá esaki di nobo. “Mi a gaña nan un aña, di dos aña ta zwarte piet a trompeká, di tres aña....awor si mi no por a sigui gaña e muchanan mas”, Anoushka a bisa ku un sonrisa riba su kara. E mes mester hari loke e tabata hasi ku e muchanan e tempu ei.

Ganadó Pasku fiesta di lus...

Asina e di dos kèrstbom den kas, e muchanan ku di nan i e ku si dje. Despues muchanan a kuminsá a bai skol i kada un ku nan kèrstbom. E muchanan ta bai ku kèrstbom skol i ora skol sera ta bai kas bek ku e kèrstbom. I asina a sigui bin mas kèrstbom aserka. I no solamente kèrstbom pero tambe e tabata dekorá su kas na lus. 25 aña pasa el a yega asta di gana e premio di Pasku Fiesta di Lus ku su dekorashon na kas.

Semper e tabata dòrnamentu. Asina tambe klientenan a kuminsá ta aserk’é ora nan mira kiko el a hasi pa su amigunan den e negoshi. Asina el a kuminsá dekorá pa negoshinan afó tambe., I dekorashon no ta Pasku so. I el a kuminsá hasi e trabou asina ‘leuk’ ku el a disidí di hasié henter aña. Buskando riba Internet el a topa un kurso di blas. El a bai wak kiko e ta kontené i a hañ’é interesante. El a bai su promé seminario na Las Vegas pa siña traha ku blas si el a sigui ekspandé su mes, kapasitá su mes mas i mas den dekorashon e tempu ei tambe di blas.

Kòrsou ta chikí i mester hasi tur kos un tiki. Si ta na paisnan grandi kada hende ta spesialisá den algu spesífiko. Pero aki e mester a siña hasi tur kos un tiki.

Bo pòtmòni...

Anoushka a bisa ku ora bo ta bai dekorá, e promé kos pa tene kuenta kuné ta bo pòtmòni. Masha dia ta esei tin di tene kuenta kuné. Antes ta haña kolonan na moda, angel na moda, fruta, vlinder, pero último añanan mirando e situashon finansiero ta bo pòtmòni ta disidí kiko ta na moda. No tin un trènt spesífiko. Aña pasá tabata ‘rosegold’ i el a keda e aña aki tambe. Den su kaso e aña aki el a usa hopi piesanan strepi strepi, kòrá bèrdè  i blanku pa hasi su dekorashonnan. Pero tantu bal bini yen koló òf kolónan spesífiko i si bo no tin sèn pa kumpr’é ta tantu bal. I p’esei un biaha mas pa kualke tipo di dekorashon segun Anoushka ta bo pòtmòni ta konta.  Kisas ta esnan di aña pasá mes tin di usa.

Twil tabata un di e telanan di adorno ku mas Anoushka tabata gusta. Esaki pasobra no tin mester di masha di dje i tòg den adorno e ta hasi hopi. I pa tiki sèn ta dòrna un kèrstbom. E aña aki no tin niun kolo spesífiko pa adorno.

Dekorá negoshi....

Den dekorashon di negoshi el a bisa ta masha difísil kon ta dòrna. Na bo kas bo bo por hasi loke bo ke pero den negoshi ta hopi hende ta frekuentá i bo mester sa presis en ki direkshon ta bai. Por ehèmpel Anoushka ta bai ‘mee’ ku kampañanan ku kisas e negoshi tin. I mester tene kuenta ku hopi hende ta drenta e negoshi i no tur hende tin mesun smak. E semper tin éksito den su dekorashonnan di negoshi.

Dòrna asta entiero....

Dekorashon no ta solamente ora di Pasku i fiesta pero Anoushka ta dòrna asta ora di entiero. El a bisa ku asta ora di mucha nan ta pidi ‘beertjes’ i blas i ta algu doloroso. Pero di e ta sinti tòg bon den e tipo di dekorashonnan ei pa por a hasi algu pa trese maske ta un tiki satisfakshon serka e famia, un alegria den e e entiero tòg.

Dekorashon ta masha importante den un selebrashon. Prinsipalmente na entrada ta importante pa e ta Waw. Ora e entrada ta bunita, paden bo por tin asta pidjama niun hende lo wòri. Un biaha mas aki ta konta e promé impreshon. No ta nada fásil pero e ta eksihí hopi kreatividat. Den desèmber Anoushka ta drumi masha malu pasobra e ta wak henter dia lus, gleter i ta pa hopi negoshi e ta dekorá. Anoushka ta lus i gleter e ta wak su dilanti pero e satisfakshon ta e alegria ku e ta trese serka otronan.

Bala no por falta den niun kèrstbom...

Anoushka a toka e punto di bala komo dekorashon den kèrstbom. Hopi hende no ke bala den nan kèrstbom pero e bala ta masha importante den kèrstbom. Un bala i un lus ku ta kai riba dje ta lag’e mustra manera ta mas lus tin. Si bo tin 24 lus den kèrstbom, e bala ei ta laga parse manera ta 48 lus tin den e kèrstbom. Esun ku no ke bala den kèrstbom ta un kèrstbom sai. Meskos ku hopi hende  a bai over den kolonan tradishonal ku ta bèrdè, kòrá i blanku. I esei ta bèrdat. I meskos no tin mester di usa flor i bala so pero por usa diferente tipo di adorno manera pòpchi tambe.

Dekorá masha ta algu chikí.....

“Mi ta sinti e aña aki ku Pasku no ta biba den e komunidat. Mi ta komprondé dikon tambe pasobra tin asina tantu kos ku a pasa ku bo òf otronan i e ta pone bo no ke selebre pero bo ta hasi bo mes pió. Bo ta keda ku e verdrit i sin kèrstbom i dekorashon. No laga e kosnan ei down bo Pasku. Pasku ta un biaha pa aña. Kisas bo no tin e moda di hasi pero maske ta un kos chikí ta trese ambiente i alegria den bo kurason. No keda sin dekorá kas pa Pasku.

Pa dekorashon Anoushka ta alkansabel na 560-6008
òf na Everyday Gift and More.