Den di 2 i 3 siman febrüari por kuminsá bakuná

WILLEMSTAD.- Den wikènt tras di lomba, gobièrnu di Kòrsou a kuminsá ku seshon di informashon tokante e programa di bakunashon na Kòrsou. E seshon di informashon ta den man di epidemiólogo sra. Iralice Jansen i dr. Ashley Duits. For di djabièrnè a reuní ku personal di kuido, organisashonnan, direktivanan di skolnan, sindikatonan, asosashon di dòkternan i spesialista. Djasabra a toka turno na prensa pa sigui e seshon informashon.
Hulanda lo finansiá e vakunanan marka Pfizer pa tur islanan di eks-Antia Hulandes.
Gobièrnu a instituí un grupo di trabou spesialmente dediká na e programa di bakunashon COVID-19 na Kòrsou. E grupo di trabou aki, ta konsistí di ekspertisio i konosementu di profeshonalnan lokal ku por yuda sostené i kanalisá e proseso di tantu distribushon di informashon komo tambe e proseso di implementashon di e bakuna aki na su debido tempu. E grupo di trabou ta konsistí di dòkternan, botikario, hurista, epidemiólogo, seguridat, hende di logístika, hende ku ta atendé ku indokumentadonan, hende di fiansa i esnan ku ta atendé ku e programa di bakunashon.
Meta di e seshonnan aki tabata primordialmente, pa di un forma interaktivo i inklusivo dialogá ku siudadanonan for di diferente grupo den komunidat pa huntu logra inventarisá puntonan di atenshon ku ta di importansia pa tene na kuenta durante e trayekto di bakunashon aki na Kòrsou. Informashon ku keda kompilá for di e diferente seshonnan aki, lo sirbi komo informashon pa e grupo di trabou den implementashon i komunikashon nashonal pa bakunashon COVID-19 na Kòrsou.
Tin henter un skema tentativo ku e tim ta traha kuné, i nos por a tuma nota ku den e di dos pa di tres siman di febrüari lo start ku bakunashon di hende riba nos isla. E siman aki e frizernan lo yega Kòrsou. Nan lo keda validá pa un kompania lokal sertifiká. E bakuna di Pfizer, ku mester keda wardá na -80 grado. Despues ku e frizernan keda validá, e “remedi” ta yega Kòrsou.
Lo tin un sitio sentral pa e bakunashon tuma lugá. Ademas lo bai trein personal di Rode Kruis, verpleegster i dòkternan di kas pa bakuna. E bakuna aki no por tum’e den konsultorio di dòkternan.
Despues di tres siman ku a haña e promé shòt di bakuna, ta haña e di dos. Apesar ku bakuna, mester sigui usa tapaboka, i tur otro medidanan di higiena. E bakuna ta traha di forma ku bo no por pega otro hende. Hende ku a haña COVID kaba mester vakuná.
Despues di 5 dia ku tuma e bakuna, e ta bai krea mas defensa den bo kurpa. Durante e 5 dianan aki, bo tin riesgo di haña COVID si bo no kuida.
Na Kòrsou e gruponan di enfoke ku lo haña e bakuna ta 60+ ku ta mas òf ménos 40 mil hende, trahadónan di den kuido ku ta alrededor di 3500 i hendenan ku malesa króniko ku ta for di 18 aña bai ariba, i nan ta 37% di poblashon. Di e 37% gran parti tambe ta hende di 60+.
Dòkter di kas lo traha e lista di hendenan di e grupo menshoná pa bakuna. Bakuna ta kompletamente boluntario. Lo sita e personanan via di app, mail òf yamada di telefòn.
Na momentu ku haña bakuna di Pfizer, e hende ta keda keda sinta 15 minüt pa monitòr si tur kos a bai bon. Si e persona tin alergia, e por haña un reakshon alérgiko despues di kaba tuma e bakuna. P’esaki e tin di haña remedi di alergia serka su dòkter di kas. Hendenan ku tin implante na pechu, ko’i sinta (atras) i òf otro partinan di kurpa, tambe ta haña un reakshon alérgiko. E reakshon alérgiko ta hopi minimalisá.
Si e hende ta aktivo di COVID e momentu ei e no por bakuna. P’esei promé ku e hende presentá pa bakuna, e regla ku si tin síntoma di grip pa keda kas, ta konta.
E síntomanan sekundario ta doló di kabes, kurpa kansa, por tembla un tiki etc.
Segun e planiamentu, entre 14 pa 16 hende pa ora por bakuna. Personal di RIVM (Rijksinstituut voor Volksgezondheid en Milieu) di Hulanda lo duna e treinen di bakuna.
Despues ku tur kos ta na lugá, lo hasi un seshon di treinen, promé ku bakuna di komunidat kuminsá.
Dr. Duits a indiká si 50% di poblashon tuma e bakuna, esaki lo no ta efektivo kontra “kombatimentu” di COVID-19.

...Prof. dr. Ashley Duits...