WILLEMSTAD. - Kuerpo polisial hasiendo un tremendo trabou. Den dos dia nan a repartí 55 but pa pasa den lus kòrá.

Ya pa hopi tempu kaba, komunidat i shofùrnan responsabel ta señalá e fenómeno di pasa den lus kòrá pa shofùrnan asosial. A bira praktikamente un normal ku hopi shofùr no ta para den lus kòrá, defakto ora e lus bira oraño, e ora ei na lugá di baha velosidat pa para, ta oumentá na velosidat pa pasa den e lus ku ta keda algun sekònde riba kòrá, hinkando e tráfiko den peliger.

Djamars 10 di sèptèmber personal di UST huntu ku personal di warda di polis di Otrobanda a tene un kontròl dirigí riba pasamentu den lus kòrá.

E kontròl aki a tuma lugá na e krusada Schottegatweg Noord i Snipweg. Riba e dia ei a repartí 25 prosèsverbal pa pasamentu den lus kòrá.

Ayera djárason 11 di sèptèmber, e kontròl  kontinuá, entre 17.06 or pa 18.10 or na e krusada Biesheuvel i Snipweg. Aki a repartí 30 prosèsverbal pa pasamentu den lus kòrá.

Pues den dos dia un total di 55 but repartí pa pasamentu den lus kòrá.

Polis ta enfatisá ku e kontròlnan aki lo kontinuá.