WILLEMSTAD.- Di e Tim Multidisiplinario ku ta realisá kontròlnan dor di medidanan imponé pa frena COVID-19 riba nos isla, ta indiká ku nan a kontrolá den dos siman 163 establesimentu. E tim ta formá pa MEO, UBW/KPC.
E resúmen dje kontròl di último dos siman ta indiká ku den e 1e periodo ku ta kore di 5 di aprel te ku 10 aprel: 78 establesimentu kontrolá, 10 establesimentu sera i a repartí 20 but.
Den e di dos periodo di 12 aprel te ku 17 aprel: 85 establesimentu kontrolá, 3 establesimentu será i a repartí 8 but.
Butnan ku a ser duná: 1) pa konsumo na lokalidat; 2) pa orario di sera; 3) pa no “delivery”; 4) pa aglomerashon; 5) pa no usa tapaboka.
Adishonal a duna instrukshon pa: 1) Desinfektá garoshi; 2) indikashon/señal pa regulá fluho di kliente spesialmente na kasa; 3) desinfektá swipe machine.
Riba foto por mira diferente establesimentu ku e tim a pasa pa kontrolá. Tambe a atendé ku hendenan ku tabata sinta bebe dilanti tokonan. Tambe algun komersiante di minimarket mester a kita stul i otro opheto ku hendenan ta bai sinta riba dje dilanti dje lugá.