WILLEMSTAD.- Centrale Bank van Curaçao en Sint Maarten (Banko Sentral) i minister di finansa ta informá ku terminashon di e operashonnan di Girobank N.V. den un forma kontrolá ta andando, konforme e anunsio hasí na e konferensia di prensa di Banko Sentral na desèmber di 2019. Den kuadro di e terminashon di operashonnan, Banko Sentral i Minister di Finansa ta trahando huntu riba un solushon pa e depositantenan. Lo implementá e solushon akí durante un fase transitorio. Den e solushon akí, ta tene kuenta ku e interesnan di personal di Girobank tambe.

Djamars, 10 di desèmber 2019, den kuadro di e moratorio, Banko Sentral a fris tur fondo ku tabatin na fin di e dia ei riba e kuentanan di Girobank.

Suma te na un máksimo di NAF 10.000 sí e depositantenan por a sigui hasi uso di dje libremente. Ademas, tur suma depositá despues di e fecha di moratorio tambe a keda disponibel libremente. P’esei, di e aproksimadamente 27.000 kuentanan di Girobank, ta riba mas o ménos 2000 kuenta so tin fondo kongelá. E depositantenan di Girobank por sigui hasi uso di nan fondonan ku ta disponibel pa lanta. Ta spera ku pronto lo tin informashon mas detayá disponibel relashoná e solushon ariba menshoná.