WILLEMSTAD.- R. Lucas tambe a presentá den sala di korte, despues ku el a keda detené den e investigashon ku a haña e nòmber Themis.

Ta trata di un kaso ku karakter internashonal di kual a detené e hòmber yu’i Kòrsou S. Quant na Dubai sospechá di ta kabesante di e gèng NLS, di kual Ministerio Públiko di Sint Maarten i Kòrsou ta akus’é pa vários kargonan kriminal.

Relashoná ku e kaso aki Ministerio Públiko ta sospechá e hòmber Lucas pa 6 echo kastigabel.

Segun ministerio Públiko Lucas ta keda akusá di ta forma parti di NLS fo’i 2015.

Tambe e ta keda akusá di ta involukrá den e asesinato di  Brown i Gumbs na Sint Maarten relashoná ku morto di Latoya Flanders ku tabata amiga di un di e lidernan di NLS ‘Nuto’ Wawoe.

Mas aleu Ministerio Públiko ta akusá Lucas pa labamentu di plaka, transportashon di 39 kilo di koka pa Sint Maarten i 40 kilo di koka na Fransia.

Fiskal a splika ku for di 1 di sèptèmber a kuminsá ku e investigashon riba esnan involukrá ku e gèng No Limit Soldiers (NLS)

Segun e investigashon un kantidat grandi di telefòn  PGP a keda kumprá entre e sospechosonan pa asina nan por komuniká.

Polis nan a logra interseptá e telefònnan aki i asina tap vários kòmbersashon ku lo bai nifiká hopi importante den e kasonan aki.  Outoridatnan a konfiská e server di e telefònnan den beslag.

Segun fiskal den e investigashon aki tin basta miembro di NLS involukrá.

Na 2015 polisnan a lesa algun mensahe kaminda  Lucas tabatin hopi kontakto ku Quant.

Tambe tabatin kombersashonnan tokante e morto di Latoya di kual tabata deliberá esnan ku tin ku keda likidá relashoná ku e asesinato.

Fiskal a bisa ku a haña hopi video i fotonan di droga ku mester a keda transportá.

Segun fiskal ainda falta algun informashon mas i p’esei ta posponé e kaso pa dia 22 ougùstùs binidero.

Abogado mr. Blonk a bisa entre otro ku no tin pruebanan relevante kontra su kliente.

Segun e abogado no por konkluí ku e kòmbersashonnan ku a haña den e telefòn ta relashoná ku e mortonan di Gumbs i Brown.

El a bisa ku e dos hòmbernan aki ta pertenesé na un gèng kriminal di Sint Maarten i ken ku ta por a keda likidá mirando ku na vários okashon nan a keda ataká debí na tantu enemigu ku nan tin na Sint Maarten.

E abogado a pidi pa suspendé detenshon di e akusado pero hues a bai di akuerdo ku Ministerio Públiko pa rechasá e petishon.