Minister Croes: Cohortaanpak tabata na mart so!

WILLEMSTAD.-Skol a kuminsá bèk dia 5 yanüari último. Muchanan por a disfrutá di un dushi fakansi di Pasku i kambio di aña. Sinembargo na momentu ku skol a habri bek a surgi malkontentu serka e sindikato DOEN ku ta bisa ku skol sekundario a habri den 2021 segun normanan bieu. E sindikato a kuestioná e desishon di minister di Enseñansa Steven Croes, mustrando ku nan ta haña esaki un desishon inkorekto.

EXTRA a tuma kontakto ku minister Croes riba e partikularidat aki. Den algun palabra e minister a bisa EXTRA di forma enfátiko ku debidamente e tabatin kombersashon ku vèlt di enseñansa promé ku el a yega na su desishon!

Mas aleu e minister di enseñansa a indiká ku e ponensia di Doen ku a habri skol sekundario segun normanan bieu, esta sin reglanan di Covid ta kuadra. Ta nifiká ku skolnan sekundario a habri bèk ku klasnan grandi, manera nan tabata promé ku Covid. Doen ta bisa ku e minister no a konsulta hustamente ku nèt esnan ku ta traha den vèlt. Di su parti e minister a splika EXTRA ku el a deliberá ku direktivanan di skol, inspekshon di enseñansa i tambe e tim di epidemiologia di dr. Gerstenbluth.

Minister Croes a bisa tambe ku skol di fundeshi si ta sigui segun normal nobo, esta ku klasnan mas chikitu. Ademas ta asina ku skolnan di fundeshi no tabatin cohortaanpak hinter e aña eskolar anterior, ta na mart so nan tabatin cohortaanpak. For di ougustus 2020 nan a sigui ku skol normal!