WILLEMSTAD.- Wes van den Enden a duna tres motibu dikon a baha e kastigu pa e hòmber apòstel Orlando “Lando” Balentin ku a keda akusá di a abusá di algun mucha di den su iglesia i tambe algun ku e tabata kuida na su kas. E echonan aki a tuma lugá ora e muchanan tabata menor di edat di entre 12 pa 15 aña .

Wes a haña ku el a abusá seksualmente di tres mucha tiner i di kuater dama adulto- yòn. Tur e damanan aki tabata miembro di e iglesia ku el a lanta, un na Kòrsou i sinku na Ulanda. El a mishi ku integridat físiko di e muchanan. Den kaso di un dje víktimanan, e abusu a kuminsá ora e no tabatin ni 15 aña.

Akto di lando tin konsekuensia riba e desaroyo i proseso seksual di e víktimanan. Den kaso di un dje víktimanan ku tabatin 19 aña ora e abuso a kuminsá, den e kuater añanan ku a sigui, e damita a sali 5 biaha na estado i a kometé aborto tur e sinku biaha nan. Aborto ta un echo hopi grave. E víktima mester a dil ku esaki sinku biaha i lo mester tabatin un impakto síkiko riba dje.

Algun dje víktimanan a keda ketu pasombra e akusado a roga nan pa keda ketu, pero e abusu no a stòp i a sigui. Komo lider di iglesia e muchanan tabatin pleno konfiansa den dje i tabata mir’e komo e figura di tata ku nan no tabatin.

E loke Lando a hasi a shòk komunidat di Kòrsou i a trese intrankilidat. E akusado a disidí di keda ketu i no a splika nada. Debí na esaki e no a mustra di tin duele di loke el a hasi. E motibu ku wes a baha e kastigu ta e echo ku dia 15 novèmber 2011 e Kódigo Penal nobo di Kòrsou a drenta na vigor.

Den e kódigo nobo, e kastigu máksimo pa tene relashon ku hende entre 12 pa 15 aña, yama e mucha menor di edat afó pa kometé akto inmoral, kometé akto inmoral for di posishon di un lider, a baha. Gran parti di e echonan aki a sosodé promé ku kambio di lei, di tal manera ku wes ta usa e lei ku tin despues di 2011 i kual ta mas na fabor dje akusado.

Tambe wes ta baha e kastigu pa motibu di algun komponente den akusashon kontra di Lando no a keda aprobá; i tambe si mira e kastigu ku ta duna den tipo di kasonan asina aki, e demanda di fiskal (18 aña) ta eksepshonalmente haltu.

E echo ku ta prohibí e akusado di ta lider di un iglesia ta pasobra e no a mira gravedat dje echo. Sikólogo a bisa ku no ta korekto pa laga e akusado bai den su posishon di “pastor”.

P’esei wes ta yega na e kastigu di 9 aña di prisòn, prohibishon di ehersé e funshon di lider di iglesia pa 14 aña. Dos siman pasa fiskal a demandá di 18 aña i prohibishon di ta lider di iglesia pa 20 aña.