Kompará ku òktober 2020 ku a midi 56 mm

WILLEMSTAD – Den luna di novèmber último un kantidat di 285.4 mm di áwaseru a kai. Meteo di Kòrsou a midi e kantidat aki i si kompará ku e mesun luna aña pasa, novèmber 2019 solamente un kantidat di 60.2 mm di áwaseru a kai. E oumento den kaida di áwaseru no mester ta un sorpresa pa niun hende komo ku esaki ta kuadra eksaktamente ku lokual Servisio Meteorológiko di Kòrsou a pronostiká for di sèptèmber último. Na e okashon ei a informá ku e aktual temporada di áwaseru (òktober te ku yanüari 2021) lo ta unu aktivo. Esaki ta debí na e fenómeno di la Niña. Ta un oumento drástiko tambe si kompará esaki ku òktober último ku 56.4 mm di awa a kai. Tabata bou di e impreshon ku hopi awa a aki na òktober pero te ora ku novèmber a dal aden. E kantidat di awa ku a kai na novèmber a surpasá òktober kasi 5 biaha.  E dia ku mas awa a kai tabata dia 10 di novèmber, 59.4 mm. Otro sifranan ku a hala atenshon ta ku tabatin 17 dia ku por lo ménos 1 mm di awa a kai. Durante luna di novèmber tabatin 104 ora di áwaseru kompará ku na novèmber 2019 ku solamente 24 ora. Pa loke ta baik 2020, Kòrsou a risibí un total di 585.2 mm di awa kompará ku solamente 135 mm na 2019 pa e mesun periodo.

Tambe por tuma nota ku e dia mas friu tabata dia 11 di novèmber pa kasi 11:50 pm ora ku a midi 22.9 grado C. E dia mas kalor tabata 3 di nòmber pa 12:49 pm ku a midi 33.3 grado C.

Manera a indiká kaba Meteo a bisa ku na luna di sèptèmber por a konfirmá ku la Niña a bira un realidat. Alrededor di kada 5 pa 7 aña e temperatura di e superfisie di laman den e área aki ta bira relativamente mas kalor (ta karga nòmber di el Niño) òf mas friu (la Niña). Estudio realisá na Servisio Meteorológiko ta indiká ku durante di un la Niña e temporada di áwaseru ku tur probabilidat por ta mas ku normal debí na e kondishonnan favorabel di atmósfera.

Meteo ta kalkulá ku e probabilidat pa temporada aki ta alrededor di 60-80% pa un temporada mas ku normal ku alrededor di 400-530 mm total. Esaki ta 10-40 % mas ku un temporada promedio (366 mm).