WILLEMSTAD.- Kontinuando ku e investigashon di tiramentu ku a tuma lugá djaweps 25 yanüari 2018, kaminda e hóben Jeangianno Jonathan Alejandro Zimmerman, nasé na Kòrsou, 18 ougùstùs 1994 a pèrdè su bida i tambe dos otro a keda herida, polis konhuntamente ku e Team di Aresto a tene un entrada hudisial dia 25 yanüari 2018 den oranan di anochi na un kas den área di Sta. Maria i tambe dos entrada hudisial mas ayera durante di oranan di atardi na un kas den Admiraalsweg. Amerikanenkamp.
Na e di dos adrès outoridatnan a realisá detenshon di un homber di inisial L.D.d.L.S.B.G. nasé na Venezuela di 19 aña di edat komo sospechoso den e kaso ariba menshoná.
Seguidamente polis a bai na un kas den área di Montaña Abou.
Durante di e investigashon den tur tres kas polis a konfiská un kantidat di kos entre otro un pikòp ku ta di sumo importansia pa e investigashon.
A presentá e sospechoso L.D.d.L.S.B.G. dilanti un Fiskal Ouksiliar ku a ordená su enkarselamentu pendiente di mas investigashon.
E sospechoso di inisial L.D.d.L.S.B.G. ta bira e di dos sospechoso ku outoridatnan a logra detené den ménos ku 48 ora despues ku e promé sospechoso di inisial C.B a keda detené e mesun mainta na hospital despues ku e la presentá ku herida di bala na lomba.
E kaso di asesinato aki un biaha mas a trese un mancha pretu na Kòrsou debí ku ta di tres hóben ku a keda asesiná den apénas e promé 25 dianan di aña.
Aparte di esaki e tiroteo a tuma lugá un kaminda ku vários persona a presensia e akto horendo aki i tambe keda herida inosentemente.
Aparte di esaki, e dos sospechosonan tambe ta hóben.
E investigashon den e kaso aki ta kontinuá i no ta ekskluí ku lo bai tin mas detenshon.