WILLEMSTAD – Den ménos ku 48 ora polis mester a duna asistensia pa otro kaso di un ulandes ku tabata aktua den forma agresivo. E último kaso aki a tuma lugá alrededor di 1or di mardugá na Mambo Beach Boulevard. Na yegada di polis na e sitio aki a bin topa e hòmber mal bati benta abou ku sla serio na kabes. E tabata drumi den un plas grandi di sanger. Polisnan mesora a inisiá un Investigashon na e sitio pa saka afó kiko lo a tuma lugá. Aparentemente un tipo rastaman na blanku bisti a bati e hòmber aki i bai lag’e. Polis mester a pidi ambulans ku urgensia pa transportá e víktima pa CMC. Atrobe polis mester a guia e ambulans paso e tipo ulandes aki tabata basta agresivo. Remarkabel ku ta di dos ulandes den ménos ku 48 ora ku ta haña den e situashon straño. Manera EXTRA a informá kaba djasabra mainta tempran polis mester a duna asistensia den bario di Dominguito pa un hóben dama stazjèr ulandes ku a bira di kabes i destruí basta kos entre nan dos outo di hende ku e no ni konosé mes. E dama aki ku sigur tabata bou di influensia di un òf otro supstansia. E no tabata por a rasoná pa nèt nada. Mester a detené i durante e detenshon polis mester a usa forsa. E tambe ku ambulans a hib’e poli bou di guia di polis pa risibí tratamentu.