WILLEMSTAD. - Ayera durante un rueda di prensa virtual, Direktor Interino di Curaçao Medical Center (CMC) sr. Gilbert Martina a duna un bista riba e promé aña CMC.

Un di e aspektonan ku sin mas a sobre salí den Martina su presentashon, ta e reto ku COVID-19 a trese kuné, mirando e echo ku CMC ta den su promé aña i ya tabatin su retonan kaba.

Retonan relashoná ku entre otro registrashon, fakturashon, lista di espera i tambe tres departamento ku a drenta CMC komo último. Martina a duna di konosé ku e tim di CMC a sa di atendé tur e retonan aki, den un forma satisfaktorio, ounke ku ainda tin algun punto ainda di atenshon.

CMC a kuminsá ku basta vakatura i a sa di yena mayoria di e vakaturanan, pero ainda tin algun vakatura. Esaki ta un di e retonan ku CMC tin di atendé kuné, sigur awor aki ku presensia di COVID-19, pa motibu ku na e momentunan aki tin personal di CMC na kas ku infekshon di COVID-19. Esaki sin mas ta trese basta reto den e aspekto di kuido na pashènt, asina Martina a bisa.

Banda di e echo ku tin personal na kas i ta pone preshon riba e kuido, tin tambe skarsedat di material. Esaki tin di aber ku ora hasi pedido pa material nan ku mester bin djafó, tin tardansa, pa motibu ku materialnan ta keda repartí ku tur otro hospital.

CMC a logra sera akuerdo ku Ulanda i Merka di manera tòg material ta yega pa garantisá kuido aki na Kòrsou.

Pero COVID-19 a trese tambe kuné tardansa pa piesa pa ekiponan por yega Kòrsou, pa motibu ku no tabatin buelo relashoná ku “lockdown”.

Tur e aspektonan aki a trese kuné kanselashon di kuido elektivo den lunanan di Mart i Aprel, pero e siman ku ta bai drenta aki, desafortunadamente, CMC mester bai kanselá kuido elektivo atrobe, pa motibu di e impakto di COVID-19 riba e personal di CMC.

Direktor interino Gilbert Martina: