WILLEMSTAD.- Na komienso di siman, EXTRA a relatá tokante e preokupashon ku ta reina serka siudadanonan relashoná ku e situashon di diferente roi.

E preokupashon aki a lanta prinsipalmente despues ku a bira konosí e situashon di wer i loke nos por spera aki na Kòrsou.

Ayera por a tuma nota ku e instansianan konserní a duna oido i a kuminsá limpia diferente roi rònt Kòrsou. Prinsipalmente den áreanan ku ta konosí ku hopi molèster durante yobida fuerte, a pone atenshon na limpiesa di roi. Sigur den áreanan di Rooseveltweg, Monte Carmelo i Saliña ta kaminda ku a atendé ku  situashon di roinan. Tambe a tuma nota ku den sierto áreanan a limpia parti di e roi i a habri e asina yamá “duiker”. Pues a habri e via kaminda awa mester pasa si dado kaso roi yena.

Ta spera ku e forma ku a limpia e roinan, aliviá e situashon un poko i asina evitá molèster pa abitantenan. Sigur esnan ku den pasado a eksperensiá ku nan kas a yena ku awa. Ta trabounan duru tabatin ku limpiesa di roinan for di den oranan trempan di dia. I segun por a tuma nota awe tambe e trabounan lo sigui miéntras por.

Importante ta pa mantené e roinan limpi i no ku ta den purá tin di kore hasi e trabounan.